આખો દેશ મહાત્મા ગાંધીને તેમની જન્મજયંતિના અવસર પર યાદ કરી રહ્યો છે. આ દરમિયાન વડાપ્રધાન નરેન્દ્ર મોદી અને રાહુલ ગાંધી સહિત અનેક નેતાઓએ રાજઘાટ જઈને તેમને શ્રદ્ધાંજલિ આપી હતી. પીએમ મોદીએ કહ્યું કે, ભારતના સ્વાતંત્ર્ય સંગ્રામમાં મહાત્મા ગાંધીના યોગદાનને ક્યારેય ભૂલી શકાય નહીં. ત્યાં જ રાષ્ટ્રપતિ દ્રૌપદી મુર્મુએ પણ રાજઘાટ પર મહાત્મા ગાંધીને તેમની જન્મજયંતિના અવસર પર શ્રદ્ધાંજલિ આપી હતી.

બાપુનું જીવન લોકો માટે પ્રેરણાસ્ત્રોત 

ટ્વિટર પર એક પોસ્ટમાં પીએમ મોદીએ કહ્યું કે, સત્ય, સમરસતા અને સમાનતા પર આધારિત પૂજ્ય બાપુનું જીવન અને આદર્શો દેશના લોકો માટે હંમેશા પ્રેરણા સ્ત્રોત બની રહેશે. રાષ્ટ્રપિતા મહાત્મા ગાંધીએ સત્ય અને અહિંસાના સિદ્ધાંતોનું ચુસ્તપણે પાલન કર્યું અને વિશ્વભરના રાજકારણીઓ અને કાર્યકરોની પેઢીઓને પ્રેરણા આપી છે.

લાલ બહાદુર શાસ્ત્રીને પણ આપી શ્રદ્ધાંજલિ

પીએમ મોદીએ ભારતના બીજા વડાપ્રધાન લાલ બહાદુર શાસ્ત્રીને પણ શ્રદ્ધાંજલિ આપી, જેમનો જન્મ પણ આ જ દિવસે થયો હતો. મોદીએ શાસ્ત્રી વિશે કહ્યું હતું કે તેમણે પોતાનું જીવન સૈનિકો, ખેડૂતો અને દેશના ગૌરવને સમર્પિત કર્યું હતું જેમણે "જય જવાન, જય કિસાન" ના નારાને જન્મ આપ્યો હતો અને તેમની સાદગી અને પ્રમાણિકતાએ તેમને વ્યાપક સન્માન આપ્યું હતું.

રાહુલ ગાંધીએ પણ પાઠવી શ્રદ્ધાંજલિ

કોંગ્રેસના સાંસદ અને વિપક્ષના નેતા રાહુલ ગાંધીએ પણ રાજઘાટ જઈને મહાત્મા ગાંધીને શ્રદ્ધાંજલિ આપી હતી.