પ્રધાનમંત્રી નરેન્દ્ર મોદી આ મહિને રાષ્ટ્રપતિ ડોનાલ્ડ ટ્રમ્પને મળવા માટે અમેરિકાની મુલાકાતે જવાના છે. આ સમય દરમિયાન તેઓ ટેસ્લા અને સ્પેસએક્સના સીઈઓ ઇલોન મસ્કને પણ મળી શકે છે. વિશ્વના સૌથી ધનિક વ્યક્તિ મસ્ક, ૧૩ ફેબ્રુઆરીના રોજ પીએમ મોદીની પસંદગીના સીઈઓ સાથેની બેઠકનો ભાગ બનશે. ઉલ્લેખનીય છે કે, ભારતમાં ટેસ્લા વિશે ઘણા સમયથી ચર્ચા ચાલી રહી છે.

ખર્ચ ઘટાડવા માટે યુએસ સરકારે બનાવેલા ડિપાર્ટમેન્ટ ઓફ ગવર્નમેન્ટ એફિશિયન્સીના વડા મસ્ક તેમની ઇલેક્ટ્રિક કાર માટે સમાન તકોની હિમાયત કરી શકે છે. તેઓ દેશમાં સસ્તી સેટેલાઇટ ઇન્ટરનેટ સેવા સ્ટારલિંકના સંચાલન શરૂ કરવા તેમજ ઇસરો સાથે સહયોગ વધારવા માટે વહેલી તકે મંજૂરી પણ માંગી શકે છે.

જોકે, પીએમ મોદી અને મસ્ક વચ્ચેની મુલાકાત અંગે હજુ સુધી કોઈ સત્તાવાર જાહેરાત કરવામાં આવી નથી. ગયા વર્ષે, મસ્કે તેમની ભારતની આયોજિત મુલાકાત મુલતવી રાખી હતી. આનું કારણ ટેસ્લાના નબળા પરિણામો હતા. ભારત મુલાકાતમાં વિલંબ અંગે મસ્કે સોશિયલ મીડિયા હેન્ડલ એક્સ પર લખ્યું હતું કે, ટેસ્લાની જવાબદારીઓને કારણે ભારત મુલાકાતમાં વિલંબ થયો છે. હું આ વર્ષના અંતમાં ભારત આવીશ.

ગયા વર્ષે જૂનમાં પીએમ મોદી રેકોર્ડ ત્રીજા કાર્યકાળ માટે ફરીથી ચૂંટાયા પછી, ટેસ્લાના સીઈઓએ તેમને અભિનંદન આપ્યા અને કહ્યું કે, તેઓ ભારતમાં તેમની કંપનીઓનો વિસ્તાર કરવા માંગે છે.  ૧૧-૧૨ ફેબ્રુઆરીએ પેરિસમાં એઆઈ સમિટમાં ભાગ લીધા બાદ પીએમ મોદી દ્વિપક્ષીય મુલાકાત માટે અમેરિકા જશે.