શહેરના રૈયાધાર ઇન્દીરાનગર વિસ્તારમાં ધમધમતી દેશીદારૂની ભઠ્ઠી પર પીસીબીની ટીમે દરોડો પાડી અહીંથી 25 લીટર દેશી દારૂ, દેશી દારૂ બનાવવાનો 100 લીટર આથો સહિત રૂ.9725 નો મુદ્દામાલ કબજે કરી એક શખસને ઝડપી લીધો હતો.જયારે એલસીબી ઝોન-2 ની ટીમ સંતોષીનગર ફાટક પાસે એકિટવામાં 25 લીટર દેશીદારૂ સાથે બે શખસોને ઝડપી લીધા હતાં.
જાણવા મળતી વિગતો મુજબ પીસીબીના ઇન્ચાર્જ એમ આર ગોંડલીયાની રાહબરી હેઠળ પીએસઆઇ એમ.જે.હુણ તથા તેમની ટીમ પેટ્રોલિંગમાં હતી. દરમિયાન હેડ કોન્સ્ટેબલ ગીરીરાજસિંહ જાડેજા અને કોન્સ્ટેબલ વાલજીભાઈ જાડાને મળેલી બાતમીના આધારે રૈયાધાર ઇન્દિરાનગર શેરી નંબર 11 પાસે આવેલી ઓરડીમાં ધમધમતી દેશી દારૂની ભઠ્ઠી પર દરોડો પાડ્યો હતો. પોલીસે અહીંથી 25 લીટર દેશી દારૂ, દેશી દારૂ બનાવવાનો 100 લીટર આથો સહિત રૂ.9725 નો મુદ્દામાલ કબજે કરી સંતોષ નરશીભાઈ વાળા (ઉ.વ 26 રહે. ગેલેક્સી કંપ્નીની ઓરડી, ગેટ નંબર 3, મેટોડા જીઆઇડીસી)ને ઝડપી લીધો હતો. તેમજ અન્ય આરોપી ગીતાબેન મહેશભાઈ મકવાણા(રહે.રૈયાધાર ઇન્દિરાનગર શેરી નંબર 11)ની સંડોવણી ખુલતા તેને ઝડપી લેવા પોલીસે તપાસ હાથ ધરી છે.
જ્યારે અન્ય દરોડામાં એલસીબી ઝોન-2 ના પીએસઆઇ આર.એચ. ઝાલાની રાહબરી હેઠળ ટીમે સંતોષીનગર ફાટક પાસે મફતિયાપરા વિસ્તારમાં એકટીવામાં દેશીદારૂની હેરફેર કરનાર મનસુખ ઉર્ફે મનોજ જયંતીભાઈ ડાભી(ઉ.વ 34 રહે. સંતોષીનગર શેરી નંબર 7) અને અશ્વિન ધીરૂભાઈ સીતાપરા(ઉ.વ 40 રહે. સંતોષીનગર મફતિયા પરા)ને ઝડપી લીધા હતા. પોલીસે એક્ટિવામાંથી રૂ.4,600 ની કિંમતનો 23 લીટર દેશી દારૂનો જથ્થો તથા એકટીવા સહિત રૂપિયા 29,600 મુદ્દામાલ કબજે કર્યો હતો આ બંને શખસોની પૂછતાછમાં પડધરીમાં રહેતા યોગેશ ભુપતભાઈ ડાભીનું નામ ખુલતા તેને ઝડપી લેવા તપાસ હાથ ધરી છે.