વકીલો, કાયદા નિષ્ણાતોને જોડાવવા મુખ્ય જિલ્લા ન્યાયાધીશની અપિલ

ખંભાળિયામાં હકદાર વ્યક્તિઓને વિનામૂલ્યે અને સક્ષમ કાનૂની સેવા ઉપલબ્ધ કરાવવા દેવભૂમિ દ્વારકા જિલ્લા કાનૂની સેવા સત્તા મંડળ તથા જિલ્લામાં તમામ ચાર તાલુકા કાનૂની સેવા સમિતિ ખાતે સિવિલ, ક્રિમિનલ, ફેમિલી મેટર્સ, જુવેનાઈલ, લેબર, ડ્રાફટીંગ અને કન્વેંસીંગ, રેવન્યુ, કન્ઝ્યુમર વિગેરે જેવી સક્ષમ વિષયોને આવરી લેતી સુદ્રઢ પેનલમાં જોડાવા ઇચ્છતા વકીલો જરૂરી ફોર્મ ખંભાળિયામાં આવેલું જિલ્લા અદાલત સ્થિત જિલ્લા કાનૂની સેવા સત્તા મંડળ કચેરીમાંથી મેળવીને તા. 31 જૂન સુધીમાં ભરીને આ કચેરીને જમા કરાવવા એક યાદીમાં જણાવાયું છે.

આ અંગેના ફોર્મ ખંભાળિયા, ભાણવડ, કલ્યાણપુર, દ્વારકા અને ઓખા તાલુકા અદાલત ખાતે લગત તાલુકા કાનૂની સેવા સમિતિ ખાતેથી પણ મેળવી શકાશે. ઈચ્છુક ઉમેદવાર વકીલોનો ત્રણ વર્ષનો પ્રેક્ટીસ કરતા હોવાનો અનુભવ હોવો આવશ્યક છે. પેનલ એડવોકેટ, રીટેનર એડવોકેટોને તેમની કામગીરી અનુસાર નાલસા અને સાલસા (NALSA/SLSA) ના નિયમોનુસાર માનદ વેતન સિવાય અન્ય કોઈ રકમ ચુકવવામાં આવશે નહી. જેમાં પેનલ એડવોકેટોને પ્રત્યેક કેસ દીઠ મહત્તમ રૂ. 30 હજારની મર્યાદાને ધ્યાનમાં રાખી પ્રત્યેક ઈફેક્ટીવ હીયરીંગ માટે રૂ. 1,000 તથા પ્રત્યેક નોન ઈફેક્ટીવ હીયરીંગ માટે રૂ. 500 ચૂકવવામાં આવશે. પરચૂરણ અરજીઓના ડ્રાફ્ટીંગ માટે રીઝોલ્યુશનમાં જણાવ્યા મુજબ પરચૂરણ ખર્ચ ચૂકવવામાં આવશે.

રીટેનર એડવોકેટને ડી.એલ.એસ.એ. કચેરીની ફ્રંટ ઓફીસ ખાતે ફરજ બજાવવા માટે પ્રતિ માસ 15,000 થી ઓછુ ન હોય તેટલું તથા TLSC કચેરીની ફ્રંટ ઓફીસ ખાતે ફરજ બજાવવા માટે પ્રતિ માસ 10,000 થી ઓછુ ન હોય તેટલું માનદ વેતન ચૂકવવામાં આવશે. જો રીટેનર એડવોકેટને કોઇ કેસ લીગલ એઈડ માટે સોંપવામાં આવશે. તો પેનલ એડવોકેટ તરીકે મળવા પાત્ર માનદ વેતન તેઓને અલગથી ચૂકવવામાં આવશે. રીસોર્સ પર્સન લીગલ એઈડ ક્લિનિકમાં કાનૂની સેવા આપવા તથા કાનૂની જાગૃતિ કાર્યક્રમ માં સેવા આપવા બદલ નિયુક્ત થયેલા વકીલને પ્રતિ દિન રૂ. 500 થી ઓછું ન હોય તેટલું માનદ વેતન ચૂકવવામાં આવશે. પેનલ એડવોકેટ, રીટેનર એડવોકેટ, રીસોર્સ પર્સનને માનદ વેતન નિયમોનુસાર વડી કચેરી તરફથી ડાયરેક્ટ બેનીફીટ ટ્રાન્સફર (DBT) માધ્યમથી ચુકવવામાં આવશે.

આ માનદ સેવા આપવા ઈચ્છતા તમામ વકીલો પેનલ એડવોકેટ (રીટેનર એડવોકેટ અને રીસોર્સ પર્સન) તરીકે જોડાવા માટે નજીકની તાલુકા અદાલત તથા જિલ્લા કક્ષાએ ખંભાળિયામાં જિલ્લા કાનૂની સેવા સત્તા મંડળ, જિલ્લા અદાલતનો સંપર્ક કરવા જિલ્લા કાનૂની સેવા સત્તા મંડળના સચિવની એક યાદીમાં જણાવવામાં આવ્યું છે.