ગોંડલ માર્કેટિંગ યાર્ડમાં ડુંગળી અને મગફળની આવક વધી રહી છે જેના કારણે યાર્ડની બહાર બંને બાજુ જણસી ભરેલા વાહનોની લાંબી કતાર લાગી ગઈ હતી. એક તરફ યાર્ડમાં આવક તો સારી એવી થઈ રહી છે અને બીજી તરફ મોટાભાગના ખેડૂતોને પોષાય એવા ભાવ મળતા નથી જેથી ખેડૂતો નારાજ જોવા મળી રહ્યા છે. બે દિવસ પહેલા ગોંડલ માર્કેટિંગ યાર્ડમાં  ડુંગળીના અંદાજે ૧.૨૦ લાખ કટ્ટાની આવક થઈ હતી અને મગફળીની ૮૦ હજાર ગુણી આવક થઈ હતી. માર્કેટિંગ યાર્ડમાં વહેલી સવારથી શ થયેલી હરાજીમાં ડુંગળીના ૨૦ કિલોના ભાવ રૂપિયા ૨૦૦ થી ૯૦૦ સુધીના ભાવ બોલાયા હતા. આ સાથે મગફળીના ૨૦ કિલોના ભાવ રૂપિયા ૮૦૦થી ૧૨૦૦ સુધીનો ભાવ ખેડૂતોને મળ્યો હતો.  ગોંડલ માર્કેટયાર્ડમાં સૌરાષ્ટ્ર્રભરમાંથી ખેડૂતો સારા ભાવની આશાએ આવતા હોય છે પરંતુ હાલ મોટાભાગનાં ખેડૂતો નિરાશ થઈ રહ્યા છે. લોધિકાથી આવેલા અશોકભાઈ કોટડીયાએ જણાવ્યું કે, ડુંગળીના ૫ વીઘાનું વાવેતર પાછળ ઓછામા ઓછો લાખથી દોઢ લખનો ખર્ચેા થયો હતો અને હવે મેળવેલ ઉત્પાદનનો ભાવ ફકત અઢી સોથી ત્રણસો બોલાય છે તો એ પોષાય તેમ સરેરાશ ૬૦૦થી ૭૦૦ ભાવ મળે તો પોષાય એમ છે. લોધિકાથી આવેલ અન્ય  ખેડૂત રાજેશભાઈએ જણાવ્યું કે એક તરફ વરસાદના કારણે ૫૦ ટકા ઉત્પાદન નિષ્ફળ ગયુ છે ત્યારે સરકાર હવે ડુંગળીમાં સહાય કરે અથવા બહાર નિકાસ કરે તો સારા ભાવ મળે. બીજી તરફ માર્કેટ યાર્ડમાં વેપારીઓ સાથે વાત કરતા તેમણે જણાવ્યું કે ડુંગળીની કવોલિટી નબળી આવી છે એટલે ભાવ સારા નથી મળી રહ્યા. યાર્ડમાં આવેલા વેપારી પિયુષભાઈ બાબરીયા એ જણાવ્યું કે, ગતવર્ષ કરતા ડુંગળીની આવક અત્યારે વધારે છે જો કે ગત વર્ષે ડુંગળીના ભાવ ૮૦૦ થી ૯૦૦ સુધીના ભાવ હતા પરંતુ આ વખતે કવોલિટી નબળી હોવાથી ૨૦૦ થી ૭૫૦ સુધીના ભાવ છે. વરસાદના કારણે ખેડૂતોની ૭૦ ટકા ડુંગળી બગડી ગઈ છે ૩૦ ટકા જ સારી રહી છે. આમ, આ વખતે ડુંગળીની આવક તો વધી છે પણ સારા ભાવ ન મળતા ખેડૂતોને સારી આવક એટલે સારા ભાવ મળતા નથી