શહેરના જૂના મોરબી રોડ પર ભગવતીપરા બ્રિજ પાસેથી પોલીસે કારમાં 42,200 ના દારૂના જથ્થા સાથે યુનિવર્સિટી રોડ પર એ.જી. ચોક પાસે રહેતા શખસને ઝડપી લીધો હતો પોલીસે દારૂનો આ જથ્થો અને કાર સહિત રૂ.1.02 લાખનો મુદ્દામાલ કબજે કરી જરૂરી કાર્યવાહી કરી છે.
દારૂના આ દરોડાની જાણવા મળતી વિગતો મુજબ, બી ડિવિઝન પોલીસ મથકના પીઆઇ એસ.એસ. રાણેની રાહબરી હેઠળ પી.એસ.આઇ જે.આર.સોલંકી તથા તેમની ટીમ જેમાં હેડ કોન્સ્ટેબલ મોહસીનખાન મલેક,કોન્સ્ટેબલ વિશ્વજીતસિંહ ઝાલા સહિતનો સ્ટાફ રાત્રિના પેટ્રોલિંગમાં હતો. દરમિયાન જૂના મોરબી રોડ પર ભગવતીપરા બ્રિજ નજીક એક શંકાસ્પદ સેન્ટ્રો કાર પસાર થતા પોલીસે આ કારને અટકાવી હતી.
પોલીસે કારચાલકનું નામ પૂછતા તેણે પોતાનું નામ મહિપાલસિંહ ઉર્ફે કાનો મહેન્દ્રસિંહ જાડેજા (ઉ.વ 24 રહે. યુનિવર્સિટી રોડ,એ. જી ચોક પાસે મૂળ,મુળીલા તા. કાલાવડ) હોવાનું જણાવ્યું હતું. પોલીસે કારની તલાસી લેતા તેમાંથી અલગ-અલગ બ્રાન્ડની દારૂની 422 ક્વાર્ટર બોટલ મળી આવી હતી. જેથી પોલીસે રૂપિયા 42,200 ની કિંમત નો દારૂનો આ જથ્થો અને સેન્ટ્રો કાર નંબર જીજે 3 બીએ 3700 સહિત કુલ રૂપિયા 1.02 લાખનો મુદ્દામાલ કબજે કરી જરૂરી કાર્યવાહી કરી હતી. દારૂના અન્ય દરોડામાં એ ડિવિઝન પોલીસે રાષ્ટ્રીય શાળા સામેથી ઓમ ઉર્ફે ઓમલો સંજયભાઈ મકવાણા (ઉવ 21 રહે.વિજય પ્લોટ શેરી નંબર 8) નામના શખસને દારૂની એક બોટલ સાથે ઝડપી લઇ જરૂરી કાર્યવાહી કરી હતી.