રાજકોટ ટીઆરપી ગેમઝોનની દુર્ઘટનામાં કેટલાય લોકોએ તેમના પરિવારના સભ્યોને ગુમાવ્યા છે.કેટલાકે પોતાના પિતા ગુમાવ્યા તો કેટલાકે પોતાના ભાઈ-બહેન. કેટલાક એવા વ્યક્તિઓ પણ છે જે બીજાને બચાવવા અંદર રહ્યા અને પોતાનો જીવ ગુમાવ્યો. આ ઘટનામાં લોકોને હચમચાવી મુકે તેવા દ્રશ્યો સામે આવ્યા હતા. 4 મુતદેહની ઓળખ થઇ અને તેમના પરિવારને મૃતદેહ સોંપતા ચારે તરફ શોકમગ્ન વાતાવરણ જોવા મળતું હતું.  મૃતદેહ સોંપાયા બાદ લોકો કંપી ઉઠે તેવા દ્રશ્યો સામે આવ્યા છે, જયારે 4 બહેનોના એકના એક ભાઈનો મૃતદેહ તેમને સોંપવામાં આવ્યો હતો. આ મૃતદેહ યાત્રાધામ વીરપુરના એક યુવકનો છે. તેની ચાર બહેનોના હૈયાફાટ રુદન જોઇને ત્યાં હાજર લોકોની આંખો પણ ભીની થઇ હતી. મૃતકનું નામ જીગ્નેશ ગઢવી છે. તે ગેમ ઝોનમાં નોકરી કરતો હતો અને ઘટનાના 20 દિવસ પહેલા જ તે નોકરીએ લાગ્યો હતો. મૃતદેહ તેના વતન વીરપુર લાવવામાં આવતાં ત્યાં શોકનું મોજું ફરી વળ્યું હતું. પરિવારજનોના હૈયાફાટ રૂદને વાતાવરણને ગમગીન બનાવી દીધું હતું.

યુવકના મોતથી તેના 10 વર્ષના પુત્રએ પિતાની છાયા ગુમાવી હતી તો બહેનોએ તેના એકના એક ભાઈને ગુમાવ્યો છે. વીરપુરમાં યુવકની સ્મશાન યાત્રામાં મોટી સંખ્યામાં લોકો જોડાયા હતા. મૃતકના પરિવારજનોએ દોષિતોને કડકમાં કડક સજા થાય તેવી તંત્ર પાસે માંગ કરી હતી.