ઓલિમ્પિક 2024 સમાપ્ત થઈ ગયું છે, જેમાં ભારતીય ખેલાડીઓએ તેમની સંપૂર્ણ તાકાત બતાવી અને દેશ માટે 7 મેડલ જીત્યા છે. હવે મોટી અને નાની કંપનીઓ ઓલિમ્પિક મેડલ વિજેતાઓને તેમની જાહેરાતોનો એક ભાગ બનાવવા માંગે છે. ખાસ કરીને 15 બ્રાન્ડ્સ વિનેશ ફોગટને તેમની જાહેરાતોનો ભાગ બનાવવા માટે તૈયાર છે. માત્ર 100 ગ્રામ વજનના કારણે વિનેશ ફોગાટ પેરિસ ઓલિમ્પિકમાં મેડલ જીતવાથી ચૂકી ગઈ હતી. પરંતુ તેની લોકપ્રિયતા જોઈને મોટી કંપનીઓ તેને જાહેરાતો માટે સાઈન કરવા માંગે છે.

પેરિસ ઓલિમ્પિકમાં સારું પ્રદર્શન કરનાર વિનેશ ફોગાટ અને અન્ય ભારતીય એથ્લેટ્સને પેકેજ્ડ ફૂડ, હેલ્થ, ન્યુટ્રિશન, જ્વેલરી, બેંકિંગ અને એજ્યુકેશન જેવી કેટેગરીમાં બ્રાન્ડનો ચહેરો બનાવવાની સ્પર્ધા છે. ફોગાટની એન્ડોર્સમેન્ટ ફી 25 લાખ રૂપિયાથી વધીને 1 કરોડ રૂપિયા થઈ ગઈ છે. જેમાં નીરજ ચોપરાને સૌથી વધુ ફાયદો થયો છે અને પછી મનુ ભાકરને ફાયદો થયો છે.

નીરજ ચોપરા અને મનુ ભાકરની બ્રાન્ડ વેલ્યુ

નીરજ ચોપરાનું બ્રાન્ડ વેલ્યુએશન 30-40 ટકા વધીને 40 મિલિયન અથવા અંદાજે રૂ. 330 કરોડ થશે, જે ભારતમાં બિન-ક્રિકેટ એથ્લેટ માટે સૌથી વધુ છે. 2023 સુધીમાં ચોપરાની બ્રાન્ડ વેલ્યુ 29.6 મિલિયન હતી.

મનુ ભાકરને થમસઅપ દ્વારા રૂ. 1.5 કરોડમાં એક વર્ષના એન્ડોર્સમેન્ટ ડીલ માટે સાઇન કરવામાં આવ્યા છે. ઓલિમ્પિક પહેલા તેની ફી દર વર્ષે 25 લાખ રૂપિયા પ્રતિ ડીલ હતી. પેરિસ ગેમ્સ પહેલા તેણે સ્પોર્ટસવેર ઉત્પાદક પરફોર્મેક્સ એક્ટિવવેરને સમર્થન આપ્યું હતું.

ભારતીય એથ્લેટ સ્ટાર નીરજ ચોપરાની એન્ડોર્સમેન્ટ ફીમાં મોટો ઉછાળો આવ્યો છે. તેમની એન્ડોર્સમેન્ટ ફી વાર્ષિક રૂ. 3 કરોડથી વધીને રૂ. 44.5 કરોડ પ્રતિ ડીલ થઈ છે. જ્યારે મનુ ભાકરની એન્ડોર્સમેન્ટ ફી વાર્ષિક રૂ. 25 લાખ પ્રતિ ડીલથી વધીને રૂ. 1.5 કરોડ થઈ ગઈ છે. એ જ રીતે વિનેશ ફોગાટની એન્ડોર્સમેન્ટ ફી વાર્ષિક રૂ. 25 લાખથી વધીને રૂ. 75 લાખથી રૂ. 1 કરોડ થઈ ગઈ છે.