જિલ્લામાં ૬૫૮૩ સ્થળોએ વિજ ચોરી પકડાતા વિજ ચોરોમાં ફફડાટ

જામનગર સહિત સમગ્ર સૌરાષ્ટ્ર-કચ્છમાં વિજ ચોરી પકડવા માટે છેલ્લા ૯ મહીનાથી અભિયાન હાથ ધરાયું છે જેમાં સમગ્ર સૌરાષ્ટ્રમાં જામનગર બીજા નંબરે આવ્યું છે, નવ મહીનામાં કુલ ૨૦૫ કરોડની વિજ ચોરી પકડાઇ જેમાં જામનગર જિલ્લામાં ૭૪.૨૫ લાખનો દંડ ફટકારવામાં આવ્યો છે.
જાણવા મળતી માહિતી મુજબ છેલ્લા કેટલાક સમયથી રેસ્ટોરન્ટ, હાઇવે હોટલ, ઘર કનેકશન, ખેતીવાડી કનેકશનમાં પીજીવીસીએલ દ્વારા દરોડા પાડવામાં આવ્યા હતાં અને સમગ્ર સૌરાષ્ટ્રમાં ૫૦૦થી વધુ ચેકીંગ ટુકડીઓએ ૩૮૫૦૬૨ વિજ કનેકશનોની ચકાસણી કરી હતી જેમાં ૬૪૭૧૫ સ્થળોએ વિજ ચોરી પકડાઇ હતી, ડાયરેકટ લંગરીયા, મીટરમાં ચેડા, સીધુ કનેકશન તેમજ અન્ય રીતે વિજ ચોરી કરવામાં આવી હતી અને આ વિજ ચોરી પકડવામાં જામનગર બીજા સ્થાને રહ્યું હતું.
જામનગર શહેરમાં બેડી, જોડીયા ભુંગા, કાલાવડ નાકા, પાણાખાણ, ગરીબનગર, તારમામદ સોસાયટી, ખોડીયાર કોલોનીનો કેટલોક વિસ્તાર, દરેડ જીઆઇડીસી સહિતના વિસ્તારોમાં અવારનવાર વિજ ચોરી પકડવા અભિયાન હાથ ધરવામાં આવે છે, જયારે પીજીવીસીએલની ટીમ દ્વારા સતત વ્યાપક દરોડા પાડવામાં આવે છે, આમ જામનગર જિલ્લામાં પીજીવીસીએલની ટીમોએ છેલ્લા ૯ મહીનામાં વ્યાપક દરોડા પાડયા છે.