અમેરિકામાંથી ગેરકાયદેસર ભારતીય ઈમિગ્રન્ટ્સને ડિપોર્ટ કરવાના મામલામાં નવો વળાંક આવ્યો છે. આજે 200 ભારતીય ઈમિગ્રન્ટ્સને લઈને એક અમેરિકન કોમર્શિયલ પ્લેન અમેરિકાના પડોશી તટીય દેશ કોસ્ટારિકા પહોંચી રહ્યું છે. પનામા અને ગ્વાટેમાલા પછી કોસ્ટારિકા ત્રીજો દેશ છે જે યુનાઇટેડ સ્ટેટ્સમાંથી હાંકી કાઢવામાં આવેલા વિદેશી ગેરકાયદે ઇમિગ્રન્ટ્સને સ્વીકારવા તૈયાર છે.

કોસ્ટારિકાના રાષ્ટ્રપતિ રોડ્રિગો ચાવેસ રોબલ્સના કાર્યાલય દ્વારા જારી કરાયેલા નિવેદન અનુસાર, કોસ્ટારિકા યુનાઇટેડ સ્ટેટ્સમાંથી ગેરકાયદેસર ઇમિગ્રન્ટ્સને પરત લાવવા માટે 'બ્રિજ' તરીકે કામ કરવા તૈયાર છે. અમેરિકાથી આવતા ગેરકાયદેસર ઇમિગ્રન્ટ્સની પ્રથમ બેચમાં મધ્ય એશિયા અને ભારતના 200 ઈમિગ્રન્ટ્સ આજે કોમર્શિયલ ફ્લાઇટ દ્વારા જુઆન સાંતામારિયા ઇન્ટરનેશનલ એરપોર્ટ પહોંચશે. અહીંથી આ નાગરિકોને તેમના દેશમાં પાછા મોકલવામાં આવશે.

અમેરિકા અત્યાર સુધીમાં 332 ગેરકાયદેસર ભારતીયોને મોકલી ચુક્યું છે. ગેરકાયદેસર પ્રવાસીઓને બહાર કાઢવાની દિશામાં ટ્રમ્પ પ્રશાસનના આ નવા પગલાને નિષ્ણાતો દ્વારા કડક પગલા તરીકે જોવામાં આવી રહ્યા છે. ટ્રમ્પે ગયા વર્ષના યુએસ ચૂંટણી પ્રચાર દરમિયાન ગેરકાયદેસર ઇમિગ્રન્ટ્સ સામે કડક વલણ અપનાવ્યું હતું, જેમાંના કેટલાકને 'રાક્ષસો' અને 'પ્રાણીઓ' ગણાવ્યા હતા.

કોસ્ટારિકાના રાષ્ટ્રપતિ કાર્યાલયના એક નિવેદન અનુસાર આ ગેરકાયદેસર ઇમિગ્રન્ટ્સને પનામાની સરહદ નજીકના કામચલાઉ સ્થળાંતર સંભાળ કેન્દ્રમાં લઈ જવામાં આવશે. યુએન સંસ્થા ઇન્ટરનેશનલ ઓર્ગેનાઇઝેશન ફોર માઇગ્રેશન (આઈઓએમ) ની દેખરેખ હેઠળ યુએસ સરકાર દ્વારા આ પ્રક્રિયાને ભંડોળ પૂરું પાડવામાં આવશે. અગાઉ ગયા અઠવાડિયે ચીન, પાકિસ્તાન, અફઘાનિસ્તાન અને અન્ય સ્થળોએથી 119 પ્રવાસીઓનું પ્રથમ જૂથ પનામા પહોંચ્યું હતું.