અત્યાર સુધી ભારતીય ક્રિકેટર ઋષભ પંતના અકસ્માતના ઘણા કારણો સામે આવ્યા છે, પરંતુ સાચું કારણ હવે સામે આવ્યું છે. ઉત્તરાખંડના મુખ્યમંત્રી પુષ્કર સિંહ ધામી આજે  મેક્સ હોસ્પિટલ પહોંચ્યા અને તેમને મળ્યા અને તેમની સ્થિતિ વિશે પૂછપરછ કરી. આ દરમિયાન ધામીએ માર્ગ અકસ્માતના કારણ વિશે પણ વાત કરી હતી. આવો તમને જણાવીએ કે પંતની કારને કેવી રીતે અકસ્માત થયો હતો.

સીએમ પુષ્કર સિંહ ધામીએ જણાવ્યું કે આ ઘટના અંગે પંતની માતા સાથે વાતચીત કરી હતી. તેમણે જણાવ્યું કે ખાડાથી બચવાનો પ્રયાસ કરતી વખતે આ અકસ્માત થયો હતો. જોકે હવે પંતની હાલત પહેલા કરતા ઘણી સારી છે. ડોકટરો અને બીસીસીઆઈના લોકો પણ તેના સતત સંપર્કમાં છે. પંતના પરિવારના સભ્યો પણ સારવારથી સંપૂર્ણ સંતુષ્ટ છે. મુખ્યમંત્રીએ પંતના ઝડપથી સ્વસ્થ થવાની પણ શુભેચ્છા પાઠવી હતી.

30 ડિસેમ્બરે માર્ગ અકસ્માત થયો હતો

30 ડિસેમ્બરે, સવારે 5.30 વાગ્યે, પંત તેની માતાને આશ્ચર્યચકિત કરવા માટે દિલ્હીથી રૂરકી પરત ફરતી વખતે ગંભીર અકસ્માતનો ભોગ બન્યા હતા. આ દરમિયાન તેમની કાર હમ્મદપુર ઝાલ પાસે રૂરકીના નરસન બોર્ડર પર ડિવાઈડર સાથે અથડાઈ હતી. અકસ્માત સમયે તે કારમાં એકલો હતો. આ દરમિયાન તેને પીઠ, કપાળ અને પગના ભાગે ઈજાઓ થઈ હતી.

​​​​​​​હરિયાણા રોડવેઝના ડ્રાઈવર-કંડક્ટરનું સન્માન

આ સાથે CM ધામીએ ગણતંત્ર દિવસના અવસર પર હરિયાણા રોડવેઝના ડ્રાઈવર સુશીલ અને કંડક્ટર પરમજીતનું સન્માન કરવાની પણ જાહેરાત કરી છે. ધામીએ કહ્યું કે ડ્રાઈવર અને કંડક્ટરે રિષભ પંતનો જીવ બચાવવા માટે પોતાનો જીવ જોખમમાં મૂક્યો હતો. જો યોગ્ય સમયે મદદ ન મળી હોત તો કંઈ પણ થઈ શક્યું હોત. આગલા દિવસે ઉત્તરાખંડ પોલીસે પણ બંનેને સન્માનિત કરવાની જાહેરાત કરી હતી.