પૂણેમાં બનેલી પોર્શની ઘટના ભૂલાવી શકાય એવી નથી. પોર્શ કાર ચલાવતા એક સગીર શ્રીમંત વ્યક્તિએ ગયા મહિને બાઇક સવાર બે એન્જિનિયરોને કચડી નાખ્યા હતા. જેના કારણે બંને એન્જિનિયરોના મોત થયા હતા. આ મામલે હજુ તપાસ ચાલી રહી છે. ત્યારે વધુ એક ખુલાસો સામે આવ્યો છે. 18-19 મેની રાત્રે સગીર આરોપી અને તેના 15 મિત્રોએ પબમાં 90 હજાર રૂપિયા ખર્ચ્યા હતા. સગીર આરોપીએ રૂ.48 હજારનો ખર્ચ કર્યો હતો. જ્યારે બાકીના 42 હજાર રૂપિયા તેના મિત્રોએ આપ્યા હતા. આ કેસમાં પુણે ક્રાઈમ બ્રાન્ચે સગીરના આ 15 મિત્રોના નિવેદનો નોંધ્યા છે.

જુવેનાઇલ જસ્ટિસ બોર્ડ (JJB) એ 17 વર્ષના સગીરનું રિમાન્ડ હોમ 25 જૂન સુધી લંબાવ્યું છે. તે 12 જૂન સુધી ઓબ્ઝર્વેશન હોમમાં રિમાન્ડ પર હતો. પુણે પોલીસે, ફરિયાદીઓ દ્વારા, તેની સલામતીને ટાંકીને અવલોકન ગૃહમાં સગીરની અટકાયતની અવધિ 14 દિવસ વધારવાની માંગ કરી હતી.

તેમણે બોર્ડને એમ પણ કહ્યું કે આ સમયે સગીરને છોડવાથી કેસની ચાલી રહેલી તપાસ અને અન્ય સંબંધિત બાબતોમાં અવરોધ આવી શકે છે. જેમાં 19 મેના અકસ્માત પછી લીધેલા તેના લોહીના નમૂનાઓની કથિત અદલાબદલીનો સમાવેશ થાય છે. બચાવ પક્ષે પુણે પોલીસની રિમાન્ડ વધારવાની અરજીનો વિરોધ કર્યો અને બોર્ડને કહ્યું કે સગીરને ઓબ્ઝર્વેશન હોમમાંથી મુક્ત કરવામાં આવે.

અનીશ-અશ્વિનીનું મૃત્યુ

બંને પક્ષોની દલીલો સાંભળ્યા પછી જેજેબીએ સગીરનો ઓબ્ઝર્વેશન હોમમાં રહેવાનો સમયગાળો 25 જૂન સુધી લંબાવ્યો. 19 મેના રોજ સવારે બિલ્ડર વિશાલ અગ્રવાલના પુત્ર સગીર દ્વારા ચલાવવામાં આવેલી પોર્શ કારે કલ્યાણી નગરમાં બાઇકને ટક્કર મારી હતી. જેમાં મધ્યપ્રદેશના રહેવાસી IT એન્જિનિયર અનીશ આવડિયા અને અશ્વિની કોષ્ટાનું મોત થયું હતું.

પોલીસના જણાવ્યા અનુસાર સગીર દારૂના નશામાં ગાડી ચલાવી રહ્યો હતો. છોકરાના માતા-પિતા સરકારી સસૂન જનરલ હોસ્પિટલમાં તેના લોહીના નમૂનાઓની કથિત અદલાબદલીના કેસમાં પોલીસ કસ્ટડીમાં છે. પોલીસે સગીરના માતા-પિતા ઉપરાંત તેના દાદા સુરેન્દ્ર અગ્રવાલની પણ ધરપકડ કરી છે. દાદા પર ડ્રાઈવરનું અપહરણ કરવાનો અને અકસ્માતની જવાબદારી લેવા માટે દબાણ કરવાનો આરોપ છે.

આ કેસમાં ધરપકડ કરાયેલા અન્ય લોકોમાં બે ડોકટરો અને સસૂન જનરલ હોસ્પિટલના એક કર્મચારીનો સમાવેશ થાય છે. જેમના પર તેની માતાના લોહીના નમૂનાઓ સાથે સગીરના લોહીના નમૂનાની કથિત અદલાબદલી કરવાનો આરોપ છે. પોલીસે અકસ્માત સંદર્ભે ત્રણ અલગ-અલગ કેસ નોંધ્યા છે. આ કેસોમાં એક એફઆઈઆર અકસ્માતના સંબંધમાં છે અને બીજો કેસ તે પબ સામેનો છે જે કથિત રીતે સગીરને દારૂ પીરસતો હતો. પોલીસે છોકરાના પિતાને માન્ય લાયસન્સ વિના કાર ચલાવવાની પરવાનગી આપવા બદલ ગુનો નોંધ્યો છે. ત્રીજો કિસ્સો પરિવાર દ્વારા ડ્રાઇવરને ખોટી રીતે કેદ કરવા અને તેને જીવલેણ અકસ્માત માટે જવાબદાર ઠેરવવા માટે દબાણ કરવાનો છે.