જમ્મુ-કાશ્મીરમાં તીર્થયાત્રીઓની બસ પર આતંકવાદી હુમલાને અંજામ આપનાર ગુનેગારોની શોધખોળની કામગીરી ઝડપી કરી દેવામાં આવી છે. સેના અને સીઆરપીએફની 11 ટીમો ઉપરી પહાડી વિસ્તારમાં સર્ચ ઓપરેશન ચલાવી રહી છે. પાકિસ્તાન સમર્થિત આતંકવાદીઓને ખતમ કરવા માટે મિશન મોડમાં કોમ્બિંગ ઓપરેશન હાથ ધરવામાં આવી રહ્યું છે. હુમલા બાદ આતંકીઓ જંગલ તરફ ભાગ્યા હતા. આવી સ્થિતિમાં રિયાસીના જંગલો ઘેરાઈ ગયા છે. કમાન્ડો અને ડ્રોન પણ ત્યાં તૈનાત કરવામાં આવ્યા છે.

રવિવારે જમ્મુ-કાશ્મીરમાં તીર્થયાત્રીઓની બસ પર આતંકવાદી હુમલો થયો હતો, જેમાં 9 લોકો માર્યા ગયા હતા. આ હુમલામાં લગભગ 41 લોકો ઘાયલ થયા છે. આ હુમલો જમ્મુ-કાશ્મીરના રિયાસી જિલ્લામાં થયો હતો. તીર્થયાત્રીઓની બસ શિવ ઘોડી મંદિરથી માતા વૈષ્ણો દેવી મંદિરના બેઝ કેમ્પ કટરા તરફ પરત ફરી રહી હતી. જંગલમાં છુપાયેલા આતંકવાદીઓએ બસ પર હુમલો કર્યો. આતંકવાદીઓએ પહેલા બસના ડ્રાઈવરને ગોળી મારી. જેના કારણે તેણે પોતાનું સંતુલન ગુમાવ્યું અને બસ ખાઈમાં પડી. જે બાદ લાંબા સમય સુધી ગોળીબાર થયો હતો. હુમલામાં બસના ડ્રાઈવર અને કંડક્ટર બંનેના મોત થયા હતા. હુમલામાં બચી ગયેલા મુસાફરોએ જણાવ્યું કે બસ ખાઈમાં પડી ગયા પછી પણ આતંકવાદીઓએ ગોળીબાર ચાલુ રાખ્યો હતો. આ બસ ઉત્તર પ્રદેશ, રાજસ્થાન અને દિલ્હીથી શ્રદ્ધાળુઓને લઈ જઈ રહી હતી.

આતંકવાદીઓ બસ પર સતત ફાયરિંગ કરતા રહ્યા

આ ગોળીબાર પછી પણ મુસાફરો શાંતિથી પડ્યા રહ્યા. જેથી આતંકવાદીઓને લાગ્યું કે તેઓ બધા મરી ગયા છે. મૃત્યુ પામેલા મુસાફરોમાં 3 વર્ષના બાળક સહિત ચાર મુસાફરો રાજસ્થાનના હતા. આ ચાર લોકો એક જ પરિવારના હતા. આ સિવાય મૃત્યુ પામેલા ત્રણ લોકો ઉત્તર પ્રદેશના હતા. ડ્રાઈવર અને કંડક્ટર રિયાસીના રહેવાસી હતા. હુમલામાં જીવ ગુમાવનારાઓમાં એક 3 વર્ષનો બાળક પણ સામેલ હતો. તેની માતાનું પણ અવસાન થયું છે. સ્થાનિક લોકોની મદદથી પોલીસે રાત્રે 8.15 વાગ્યા સુધીમાં તમામ મુસાફરોને બહાર કાઢ્યા અને હોસ્પિટલ લઈ ગયા.

હુમલાની તપાસ NIAને સોંપવામાં આવી હતી

ઘટના સ્થળે પોલીસ, ભારતીય સેના અને સીઆરપીએફનું અસ્થાયી સંયુક્ત ઓપરેશન હેડ ક્વાર્ટર બનાવવામાં આવ્યું હતું. પાકિસ્તાન સમર્થિત આતંકવાદી સંગઠન ધ રેઝિસ્ટન્સ ફ્રન્ટે આ હુમલાની જવાબદારી લીધી છે. TRF ને વર્ષ 2023માં ભારત સરકાર દ્વારા આતંકવાદી સંગઠન જાહેર કરવામાં આવ્યું હતું. કલમ 370 હટાવ્યા બાદ વર્ષ 2019માં તેની રચના કરવામાં આવી હતી. તે અનેક આતંકી હુમલાઓમાં સામેલ રહ્યો છે. સૂત્રોના જણાવ્યા અનુસાર આ હુમલામાં 2 થી 3 આતંકીઓ સામેલ હતા. આ આતંકવાદીઓ પાકિસ્તાની છે અને તે જ જૂથનો ભાગ છે. જે રાજૌરી અને પૂંચમાં તાજેતરમાં થયેલા હુમલામાં સામેલ હતો. આ ગ્રૂપ છેલ્લા બે વર્ષથી પીર-પંજાલ વિસ્તારમાં સક્રિય છે. આ આતંકીઓને શોધવા માટે સતત સર્ચ ઓપરેશન ચાલુ છે. આતંકવાદીઓને શોધવા માટે ડ્રોનની મદદ પણ લેવામાં આવી રહી છે. આ હુમલાની તપાસ NIAને સોંપવામાં આવી છે.

આતંકવાદીઓ જંગલોમાં છુપાયા

સુરક્ષા એજન્સીઓના જણાવ્યા અનુસાર હુમલો કરનાર આતંકવાદીઓ જંગલમાં છુપાયેલા છે. સુરક્ષા દળોને શંકા છે કે આતંકવાદીઓ રાજૌરી અને રિયાસીના પહાડી વિસ્તારોમાં છુપાયેલા છે. આ વિસ્તારમાં સર્ચ ઓપરેશન તેજ કરી દેવામાં આવ્યું છે. અધિકારીઓએ જણાવ્યું કે હુમલા માટે જવાબદાર ત્રણ લશ્કર-એ-તૈયબના આતંકવાદીઓની શોધ કરવામાં આવી રહી છે. તેમણે ઘટનાસ્થળે ચોથા આતંકવાદીની હાજરીની શક્યતાને નકારી કાઢી નથી.

ઉધમપુર-રિયાસી રેન્જના ડેપ્યુટી ઈન્સ્પેક્ટર જનરલ ઓફ પોલીસ રઈસ મોહમ્મદ ભટે જણાવ્યું હતું કે અમને કેટલીક કડીઓ મળી છે. પોલીસ, સેના અને સીઆરપીએફની 11 ટીમો સર્ચ ઓપરેશનમાં લાગેલી છે. આતંકવાદીઓને ખતમ કરવા માટે અલગ-અલગ મોરચે સંયુક્ત કામગીરી કરવામાં આવી રહી છે. પોલીસ, આર્મી, નેશનલ ઇન્વેસ્ટિગેશન એજન્સી (NIA) અને કેન્દ્રીય ગુપ્તચર એજન્સીઓ કોમ્બિંગ ઓપરેશનમાં સામેલ છે. અનેક લોકોની પૂછપરછ માટે અટકાયત કરવામાં આવી છે.

ઓપરેશનનું નેતૃત્વ કરી રહેલા ડીઆઈજીએ કહ્યું કે  અમારી કાર્યવાહી ચાલુ છે. અમે અલગ-અલગ ઇનપુટ્સના આધારે કામ કરી રહ્યા છીએ. બે અલગ-અલગ મોરચે કામ કરવા માટે અનેક ટીમો બનાવવામાં આવી છે. જ્યારે તપાસ પણ વધુ ઝડપે ચાલી રહી છે. પૂછપરછ માટે કેટલાંક લોકોની અટકાયત કરવામાં આવી હોવાના સવાલ પર તેમણે કહ્યું કે  આ મામલે કંઈપણ કહી શકાય તેમ નથી પરંતુ અમને કેટલાક સંકેતો મળ્યા છે અને અમે આતંકવાદીઓને શોધી કાઢવા માટે કડીઓ એકત્રિત કરી રહ્યા છીએ.

ગાઢ જંગલને કારણે કામગીરીમાં મુશ્કેલી

તેમણે કહ્યું કે આ વિસ્તારમાં ગાઢ જંગલો હોવાથી પાણીના સ્ત્રોતની અછત છે. જંગલમાં આગ લાગવાનો પણ ભય છે. ત્યાં ઢોળાવવાળી અને કુદરતી છુપાવાની જગ્યાઓ છે. સર્ચિંગ ઓપરેશનમાં સુરક્ષા દળો માટે આ એક મોટો પડકાર છે. સર્ચ ટીમ સાવચેતીપૂર્વક આગળ વધી રહી છે. સેના અને સીઆરપીએફના સંકલનમાં 11 ટીમો તૈનાત કરવામાં આવી છે. આતંકવાદીઓને મારવા માટે સંયુક્ત પ્રયાસો ચાલુ છે.

એલજી ઘાયલોને મળ્યા

આ ઘટના દરમિયાન લેફ્ટનન્ટ ગવર્નર મનોજ સિન્હાએ હુમલાની નિંદા કરી અને તેને વિસ્તારમાં શાંતિ ભંગ કરવાની યોજનાનો ભાગ ગણાવ્યો. તે જમ્મુ અને રિયાસી હોસ્પિટલોમાં ઘાયલોને મળ્યા અને સુરક્ષા સ્થિતિની સમીક્ષા કરવા માટે એક ઉચ્ચ સ્તરીય બેઠકની અધ્યક્ષતા કરી. સિન્હાએ કહ્યું કે વડાપ્રધાન નરેન્દ્ર મોદી અને કેન્દ્રીય મંત્રી અમિત શાહને સ્થિતિ વિશે જાણકારી આપવામાં આવી છે. હુમલા માટે જવાબદારોને બક્ષવામાં આવશે નહીં. તેમણે વધુમાં કહ્યું કે હું લોકોને આશ્વાસન આપું છું કે રિયાસીમાં શ્રદ્ધાળુઓ પર થયેલા હુમલા પાછળ અને તેમની મદદ કરનારાઓને સજા કરવામાં આવશે.

જમ્મુમાં પાકિસ્તાન વિરુદ્ધ વિરોધ પ્રદર્શન

પ્રશાસને મૃતકોના પરિવારજનો માટે રૂ. 10 લાખ અને ઇજાગ્રસ્તોને રૂ. 50,000ની સહાયની મંજૂરી આપી છે. કટરા, ડોડા,જમ્મુ શહેર અને કઠુઆ જિલ્લા સહિત જમ્મુ પ્રદેશમાં પાકિસ્તાન વિરોધી વિરોધ પ્રદર્શનો થયા હતા. આવી ઘટનાઓને રોકવા માટે સુરક્ષા પગલાં વધારવાની માંગણી કરી હતી. પ્રદર્શનકારીઓએ પાકિસ્તાન પર જમ્મુ અને કાશ્મીરમાં આતંકવાદને પ્રાયોજિત કરવાનો આરોપ લગાવ્યો અને પાડોશી દેશ સામે કાર્યવાહીની માંગ કરી હતી.