રાષ્ટ્રપતિ ટ્રમ્પના બે વિશ્વાસુ સહાયકો ડોજ સુપ્રીમો ઈલોન મસ્ક અને પીટર નૈવારો વચ્ચે અણબનાવના અહેવાલો છે. એવું કહેવામાં આવી રહ્યું છે કે બંનેએ ટેરિફ અંગે જાહેર ચર્ચા પણ થઇ હતી.2 એપ્રિલના રોજ, ટ્રમ્પે લગભગ 180 દેશો પર છૂટછાટવાળા પારસ્પરિક ટેરિફ લાદ્યા. આના કારણે અમેરિકન શેરબજાર ક્રેશ થયું. ગયા અઠવાડિયે ડોવ જોન્સ, એસએન્ડપી 500 અને નાસ્ડેકમાં પાંચ ટકાથી વધુનો ઘટાડો જોવા મળ્યો. 2020 પછી યુએસ શેરબજારમાં આ સૌથી મોટો ઘટાડો હતો.

દરમિયાન, એક મુલાકાતમાં ટ્રમ્પના સાથી અને તેમના વહીવટના વરિષ્ઠ સલાહકાર પીટર નૈવારોએ ટેરિફને ટેકો આપ્યો. નૈવારોએ જણાવ્યું હતું કે તીવ્ર ઘટાડા પછી બજારમાં ફરી ઉછાળો જોવા મળશે. ટ્રમ્પના કાર્યકાળ દરમિયાન ડોવ જોન્સ 50,000 ને સ્પર્શશે.નૈવારોનો આ ઇન્ટરવ્યુ સોશિયલ મીડિયા પર વાયરલ થયો ત્યારબાદ મસ્કે સોશિયલ મીડિયા પોસ્ટમાં તેમના પર નિશાન સાધતા કહ્યું કે હાર્વર્ડથી ઇકોનમાં પીએચડી કરવી સારી વાત નથી, ખરાબ છે. નૈવારોએ હાર્વર્ડમાંથી પીએચડીની ડિગ્રી મેળવી છે.

આ પહેલા પણ મસ્કે આશા વ્યક્ત કરી હતી કે અમેરિકા અને યુરોપ વચ્ચે ટેરિફ શૂન્ય રહેશે. તેમણે કહ્યું હતું કે મને આશા છે કે યુરોપ અને અમેરિકા સાથે મળીને આગળ વધે. મારા મતે શૂન્ય ટેરિફ સ્થિતિ વધુ સારી રહેશે, જે યુરોપ અને ઉત્તર અમેરિકા વચ્ચે મુક્ત વેપારને મંજૂરી આપશે. ટ્રમ્પે યુરોપિયન યુનિયન પર 20 ટકા ટેરિફ લાદ્યો છે તે જાણીતું છે.અમેરિકા અને યુરોપ વચ્ચે શૂન્ય ટેરિફ અંગે મસ્કના નિવેદન પર નૈવારોએ કહ્યું કે એ જાણવું રસપ્રદ છે કે મસ્ક યુરોપ સાથે શૂન્ય ટેરિફ ઝોન વિશે વાત કરી રહ્યા હતા. ખરેખર, તે બિલકુલ સમજી શકતો નથી. મને લાગે છે કે ઈલોન માટે કારના વેચાણને સમજવું વધુ સારું રહેશે. તે આ જ કામ કરે છે.

વ્હાઇટ હાઉસના રોઝ ગાર્ડનમાં મીડિયાને સંબોધિત કરતી વખતે ટ્રમ્પે 2 એપ્રિલને અમેરિકા માટે મુક્તિ દિવસ તરીકે ઓળખાવ્યો હતો. ટ્રમ્પે કહ્યું કે અમેરિકાને ઘણા સમયથી આ મુક્તિ દિવસની જરૂર હતી. હવેથી, 2 એપ્રિલને અમેરિકન ઉદ્યોગના પુનર્જન્મ તરીકે યાદ કરવામાં આવશે. આપણે આ દિવસને એ દિવસ તરીકે યાદ રાખીશું જ્યારે અમેરિકા ફરીથી એક સમૃદ્ધ રાષ્ટ્ર બન્યું. આપણે અમેરિકાને ફરીથી સમૃદ્ધ બનાવીશું.