ગેઇટ કુદીને મહિલાઓ ત્રાટકી: કુલ ૧૭ રોલ મળી ૧.૯૫ લાખની ચોરી

જામનગર નજીક મેઘપર પડાણા વિસ્તારમાં સીઆર-૩ (ઇન્ડીયા) પ્રા.લી. કંપનીની કમ્પાઉન્ડ ગેઇટ કુદીને અંદર ત્રાટકેલી મહિલાઓ ૩૦ મીટરના ૧૨ રોલ, ૫૦ મીટરના ૫ રોલ મળી કુલ ૧.૯૫ લાખના કોપર વાયરની ચોરી કરી ગઇ હતી જે અંગેની વિગતો સામે આવતા આ અંગે અજાણી મહિલાઓ સામે પડાણા પોલીસમાં ફરીયાદ કરવામાં આવી છે.
મળતી વિગત મુજબ જામનગરના ખોડીયાર કોલોની ગુરુકૃપા એપાર્ટમેન્ટ ફલેટ નં. ૨૦૧માં રહેતા મુકેશકુમાર જયંતીલાલ ચાવડાએ ગઇકાલે પડાણા પોલીસમાં અજાણી સાતથી આઠ મહિલાઓ સામે ચોરીની ફરીયાદ કરી છે. ફરીયાદીની સીઆર૩ (ઇન્ડીયા) પ્રા.લી. કંપનીની દિવાલ ઇમરજન્સી ગેઇટ તરીકે ઉપયોગ થતા આ ગેઇટ કુદીને ગત તા. ૧૭-૩-૨૪ના સમયગાળા દરમ્યાન અજાણી મહિલાઓએ ગેરકાયદે પ્રવેશ કર્યો હતો.
દરમ્યાન કંપનીના યાર્ડમાં પડેલો ૩૦ મીટરના ૧૨ કોપર કેબલના રોલ જેની કિ. રુા. ૧.૨૦ લાખ તથા ૫૦ મીટરના ૫ કેબલ રોલ જેની અંદાજે કિ. ૭૫ હજાર મળી અલગ અલગ સાઇઝના કુલ કોપર કેબલના ૧૭ રોલ જેની કુલ કિ. ૧.૯૫ લાખ જેનો અંદાજે વજન ૨૦૦ થી ૩૦૦ કી.ગ્રા. થાય છે આ મુદામાલની ચોરી કરી ગયા છે. ફરીયાદના આધારે પડાણા પોલીસ દ્વારા તપાસ કરવામાં આવી રહી છે, સીસીટીવી કેમેરા ચેક કરવામાં આવી રહયા છે. મહિલાઓ કોપર કેબલ લઇ ગયાનું સામે આવતા આ દિશામાં ચક્રો ગતીમાન કરવામાં આવ્યા છે.
***
દ્વારકાના મંદિર પાસેથી મોબાઈલ સેરવી જતા તસ્કરો
રાજકોટના મોવડી પ્લોટ વિસ્તારમાં રહેતા શૈલેષભાઈ કડવાભાઈ તરપડા (ઉ.વ. ૪૫) એ ગત તારીખ ૨૦ માર્ચના રોજ દ્વારકાના રૂક્ષ્મણી મંદિર નજીક રાખેલો રૂપિયા ૨૦,૦૦૦ ની કિંમતનો સેમસંગ કંપનીનો મોબાઈલ ફોન કોઈ તસ્કરો ચોરી કરીને લઈ ગયા હોવાની ફરિયાદ દ્વારકા પોલીસ મથકમાં નોંધાવવામાં આવી છે.