શહેરમાં તાવ, શરદી, ઉધરસ અને ગળુ બેસી જવાના કેસોમાં વધારો, બપોરનાં ગરમી અને સવાર-સાંજ ઠંડીનુ મિશ્ર વાતાવરણ

જામનગર અને દેવભૂમિ દ્વારકા જિલ્લામાં હવે ઠંડી-ગરમીની મિશ્ર ઋતુ થઇ ચુકી છે સવારે અને સાંજે ઠંડીનું વાતાવરણ જોવા મળે છે જેને કારણે લોકો હેરાન પરેશાન થઇ રહ્યા છે. ખાસ કરીને મહતમ તાપમાન 32 ડીગ્રીને પાર કરી 32.7 ડીગ્રી થઇ ગયુ છે ત્યારે આગામી દિવસોમાં હજુ વધુ ગરમી પડશે તેવુ હવામાન ખાતાનું કહેવું છે.

કલેકટર કચેરીનાં કંટ્રોલમના જણાવ્યા અનુસાર લઘુતમ તાપમાન 16 ડીગ્રી, મહતમ તાપમાન 32.7, હવામાં ભેજ 79 ટકા, અને પવનની ગતિ 15થી 20 પ્રતિકલાક જોવા મળી હતી. ખાસ કરીને સાંજના પ વાગ્યા બાદ છેલ્લા કેટલાક દિવસથી વાતાવરણમાં પલટો આવે છે અને શરદી, ઉધરસ તેમજ તાવ અને ગળામાં દુખાવાનાં કેસોમાં પણ વધારો થયો છે.

વચ્ચે ચારેક દિવસ સુધી ગાઢ ઘુમ્મસનું વાતાવરણ જોવા મળ્યું હતું હવામાન ખાતાનું કહેવું છે કે ધીરે ધીરે ગરમીની શરુઆત થશે એટલે કે મહતમ તાપમાન હવે 33 ડીગ્રી નજીક પહોંચી ગયું છે. કાલાવડ, ધ્રોલ, જોડીયા, ખંભાળીયા, લાલપુર, જામજોધપુર, ભાણવડ, કલ્યાણપુર, દ્વારકા, ભાટીયા, રાવલ, સલાયા, ફલ્લા સહિતનાં ગામોમાં પણ વાતાવરણમાં પલટો આવ્યો છે અને બપોરનાં 12 થી 5 દરમ્યાન ઉનાળા જેવી શરુઆત થઇ ચુકી છે.

વહેલી સવારનાં પણ ઠંડીનો માહોલ જોવા મળે છે. ત્યારબાદ ધીરે ધીરે ગરમીની શરુઆત થાય છે. અત્યારથી જ તાપમાન વધતુ રહ્યું છે ત્યારે આ વખતે ગરમી પણ સારી એવી પડશે તેમ હવામાન ખાતાનુ કહેવું છે સામાન્ય રીતે ફેબ્રુઆરીનાં અંત પછી હોળી સુધીમાં ઠંડી વિદાય લેશે આ વખતે પણ આ પ્રકારનું વાતાવરણ સર્જાય તેવી શકયતા છે.