'જલ થલ રક્ષા 2025' યુદ્ધાભ્યાસ હેઠળ સેના-કોસ્ટગાર્ડે સંયુક્ત અભ્યાસ કર્યો

ગુજરાતના પશ્ચિમી દરિયાકાંઠાની સુરક્ષા વ્યવસ્થાને વધુ મજબૂત બનાવવા માટે બેટ દ્વારકા ખાતે જલ થલ રક્ષા 2025 નામનો મહત્વપૂર્ણ સૈન્ય યુદ્ધાભ્યાસ યોજવામાં આવ્યો હતો. દેશની સુરક્ષા માટે આયોજિત આ કવાયતમાં ભારતીય સેનાની અમદાવાદ સ્થિત 11 ઇન્ફન્ટ્રી ડિવિઝન અને જામનગર સ્થિત 31 ઇન્ફન્ટ્રી બ્રિગેડે કોસ્ટ ગાર્ડ અને મરીન પોલીસ સાથે મળીને સંયુક્ત અભ્યાસ કર્યો હતો.આ મહત્વપૂર્ણ યુદ્ધાભ્યાસમાં જિલ્લા વહીવટી તંત્ર, ગુજરાત મેરિટાઇમ બોર્ડ, એનએસજી, મત્સ્ય વિભાગ, કસ્ટમ્સ અને વન વિભાગના પ્રતિનિધિઓએ પણ સક્રિય ભાગ લીધો હતો. ડ્રગ્સ તસ્કરી અને 26/11 જેવા આતંકી હુમલાઓને ધ્યાનમાં રાખીને આ યુદ્ધાભ્યાસનું આયોજન કરવામાં આવ્યું હતું.

દરિયાઈ સીમાઓથી ઘેરાયેલા દ્વારકા વિસ્તારમાં કોઈપણ પ્રકારની આતંકવાદી પ્રવૃત્તિ કે દુશ્મન દેશના હુમલા સામે તત્કાલ અને અસરકારક પ્રતિસાદ આપવા માટે સૈન્ય દળો સંપૂર્ણપણે સજ્જ છે. આ યુદ્ધાભ્યાસ દ્વારા વ્યૂહાત્મક રીતે મહત્વપૂર્ણ એવા દરિયાકાંઠાના વિસ્તારોની સુરક્ષા વ્યવસ્થાને વધુ મજબૂત બનાવવાનો પ્રયાસ કરવામાં આવ્યો છે.