ભાણવડ તાલુકામાં પાંચ ઈંચ ખાબક્યો: ખંભાળિયાનો ઘી ડેમ ઓવરફ્લો

દેવભૂમિ દ્વારકામાં છેલ્લા ચાર દિવસથી મેઘ મહેરના બદલે મેઘ કહેર વરસી રહી છે. ત્યારે ગઈકાલે મંગળવારે વધુ સાત ઈંચ વરસાદ વરસી જતા દ્વારકામાં ઐતિહાસિક કહી શકાય તેટલો 54 ઈંચ વરસાદ પડી ચૂક્યો છે.

દ્વારકા તાલુકામાં મંગળવારે સાંજ સુધીના સમયગાળા દરમિયાન ભારે ઝાપટા અવિરત રીતે વરસ્યા હતા. જેના કારણે કુલ સાત ઈંચ (174 મી.મી.) પાણી પડી ગયું હતું. જેના પગલે ઠેર ઠેર ઝડપી પરિસ્થિતિ જોવા મળી હતી.

ભાણવડ તાલુકામાં પણ સચરાચર પાંચ ઈંચ જેટલો (119 મી.મી.) વરસાદ ખાબકતા ઠેર ઠેર નદી જેવા પાણી વહ્યા હતા. ખંભાળિયા પંથકમાં પણ ગઈકાલે દિવસ દરમિયાન તેમાં જાહેર વહેલી સવારે અવીરત રીતે ભારે ઝાપટાનો દૌર જારી રહેતા બે ઈંચ (48 મી.મી.) પાણી પડી ગયું છે. આ જ રીતે કલ્યાણપુર તાલુકામાં પણ મંગળવારનો વરસાદ બે ઈંચ નોંધાયો છે.

જિલ્લામાં મોસમનો કુલ વરસાદ સૌથી વધુ દ્વારકામાં 54 ઈંચ, કલ્યાણપુરમાં 50 ઈંચ, ખંભાળિયામાં 43 ઈંચ અને ભાણવડ પંથકમાં 28 ઈંચ સાથે જિલ્લાનો કુલ સરેરાશ વરસાદ 44 ઈંચ નોંધાઈ ચૂક્યો છે.

ખંભાળિયા અને ભાણવડ પંથકમાં અવીરત રીતે વરસાદ વરસતા શહેરને પાણી પૂરું પાડતો ઘી ડેમ ગઈકાલે બપોરે છલકાઈ ગયો હતો. જેથી આ વિસ્તારના લોકોમાં આનંદની લાગણી જોવા મળી હતી.