બિપરજોય વાવાઝોડું આગળ વધી રહ્યું છે અને તેમની તીવ્રતા ખુબ જ છે. જેના અનુસંધાને તમામ તંત્રો એલર્ટ થઇ ગયા છે. રાજકોટ મહાનગરપાલિકા પણ વાવાઝોડાના અનુસંધાને ઝુંબેશના રૂપમાં જુદા જુદા પગલાં લઈ રહી છે. આ કામગીરી અનુસંધાને મેયર ડૉ. પ્રદિપ ડવ તથા ઈ.ચા. મ્યુનિ. કમિશનર અનિલ ધામેલિયાએ આજ રોજ સવારથી જ શહેરના અલગ અલગ વિસ્તારોની મુલાકાત લઇ લોકોના સ્થળાંતર, હોર્ડિંગ અને બેનર હટાવવા, બાંધકામ સાઈટ અને ભંગારના ડેલા બંધ રખાવવા સહિતની કામગીરીની સમીક્ષા કરી હતી તેમજ સ્લમ વિસ્તારના લોકોને વાવાઝોડાની ગંભીરતા સમજાવી સ્થળાંતર માટે સમજાવ્યા હતા.
​​​​​​​
      

વાવાઝોડા અંતર્ગત આજરોજ મેયર ડૉ. પ્રદિપ ડવે અલગ અલગ વિસ્તારમાં ચાલી રહેલા હાઈરાઈઝ બિલ્ડીંગ બાંધકામની મુલાકાત લીધી હતી. બહાર ઝુપડામાં રહેતા બાંધકામના શ્રમિકોને અંદર સલામત સ્થળે ખસેડવા તેમજ આજથી તા. ૧૫ જુન સુધી બાંધકામ સાઈટ બંધ રાખવા વિનંતી કરી હતી.

આ ઉપરાંત વોર્ડ નં.૧માં આવેલા રૈયાધાર ઝુપડાપટ્ટીની પણ મુલાકાત લીધી હતી. મુલાકાત દરમ્યાન કાચા અને ઝુપડા મકાનમાં રહેલા લોકોને સ્થળાંતર કરવા સમજાવવામાં આવ્યા હતા તેમજ અધિકારીઓને પણ આજુબાજુની સ્કૂલોમાં આવા લોકોનું સ્થળાંતર કરવા અને ફૂડ પેકેટ્સની પણ વ્યવસ્થા કરવામાં આવી છે. આ ઉપરાંત ભંગારના ડેલાના ધંધાર્થીઓને ડેલા બંધ રાખવા સમજાવવામાં આવ્યા હતા.