દિલ્હી વિધાનસભા ચૂંટણીમાં આમ આદમી પાર્ટીને મોટો ફટકો પડ્યો છે. એક તરફ, AAP કારમી હાર તરફ આગળ વધી રહી છે. બીજી તરફ, દિલ્હીના ભૂતપૂર્વ મુખ્યમંત્રી અને AAP કન્વીનર અરવિંદ કેજરીવાલ નવી દિલ્હી બેઠક પરથી ચૂંટણી હારી ગયા છે. ભાજપના ઉમેદવાર પ્રવેશ વર્માએ તેમને હરાવ્યા. જ્યારે કોંગ્રેસના સંદીપ દીક્ષિત ત્રીજા સ્થાને રહ્યા છે. તેમજ મનિષ સિસોદિયા પણ હારી ગયા છે. જ્યારે આતિશીએ પાર્ટી લાજ બચાવી જીત હાંસલ કરી છે. તેઓ  989 મતે જીત મેળવી રમેશ બિધૂડીને હરાવ્યા છે. 

કેજરીવાલ હાર્યા, ભાજપના પ્રવેશ વર્મા જીત્યા
આમ આદમી પાર્ટીના કન્વીનર અરવિંદ કેજરીવાલ નવી દિલ્હી બેઠક પરથી ચૂંટણી હારી ગયા છે. અહીંથી ભાજપના પ્રવેશ વર્મા જીત્યા છે. કેજરીવાલ 3 હજારથી વધુ મતથી હાર્યા છે.

સિસોદિયાએ કહ્યું- 600 મતથી હારી ગયો
AAP નેતા મનીષ સિસોદિયાએ જંગપુરા બેઠક પરથી હાર સ્વીકારી લીધી છે. તેમણે કહ્યું, જંગપુરાએ પ્રેમ, સ્નેહ અને સમાનતા આપી. તેઓ લગભગ 600 મતોથી પાછળ રહ્યા.

સત્યેન્દ્ર જૈન પણ ચૂંટણી હાર્યા
શકુર બસ્તી બેઠક પરથી આપના સત્યેન્દ્ર જૈન પણ ચૂંટણી હારી ગયા છે. શાલીમાર બાગથી ભાજપના રેખા ગુપ્તાએ 29595 મતોથી ચૂંટણી જીતી છે. આ દરમિયાન, નવી દિલ્હી બેઠક પરથી ચૂંટણી જીત્યા બાદ, પ્રવેશ વર્મા મતગણતરી કેન્દ્ર પર પહોંચી ગયા છે. અહીં તેને વિજયનું પ્રમાણપત્ર આપવામાં આવશે.

દિલ્હીમાં AAP કાર્યાલયમાં અંદરથી તાળું મારી દેવાયું
દિલ્હીમાં આમ આદમી પાર્ટીનું કાર્યાલય બંધ કરી દેવામાં આવ્યું છે. અહીં કામદારો અંદર જઈ શકતા નથી, તેથી અરાજકતાનું વાતાવરણ છે. મીડિયા કર્મચારીઓને પણ ઓફિસમાંથી બહાર કાઢી મૂકવામાં આવ્યા છે.