રાજ્ય ચૂટણી પંચ આજે સાંજે સાડા ચાર વાગ્યે પ્રેસ કોન્ફરન્સ યોજીને સ્થાનિક સ્વરાજ્યની ચૂંટણીની તારીખો જાહેર કરશે. જેમાં જૂનાગઢ મહાનગરપાલિકાની ચૂંટણી સહિત રાજ્યની 70 નગરપાલિકાની ચૂંટણીઓ જાહેર કરાશે. રાજ્યમાં આવનારી સ્થાનિક સ્વરાજ્યની ચૂંટણીઓમાં 27 ટકા ઓબીસી, 14 ટકા એસટી અને 7 ટકા એસસી અનામત બેઠકો રહેશે.

સ્થાનિક સ્વરાજ્યની ચૂંટણીને લઈને તૈયારીઓ પણ શરૂ કરી દેવામાં આવી છે. ગાંધીનગરમાં મળેલી કેબિનેટ બેઠકમાં મંત્રીઓને સ્થાનિક સ્વરાજ્યની ચૂંટણીઓ અંગે જવાબદારી સોંપવામાં આવી છે. કેબિનેટની બેઠકમાં મંત્રીઓને જિલ્લા પ્રમાણે જવાબદારી સોંપવામાં આવી છે. આ ઉપરાંત ચૂંટણી પંચે તમામ જિલ્લાના કલેક્ટરોને ચૂંટણીને મુદ્દે આયોજનપૂર્વક આગળ વધવા સૂચના આપી છે. 

મહત્વનું છે કે, સ્થાનિક સ્વરાજ્યની ચૂંટણીને લઈ રાજ્ય ચૂંટણી આયોગની આખરી તૈયારીઓ પૂર્ણ કરી દેવામાં આવી છે. પંચાયત, નગરપાલિકા, અને જૂનાગઢ તથા અન્ય મહાનગરપિલાકા ચૂંટણીઓની આખરી તૈયારીઓ હાલમાં ચાલી રહી છે. ગત મહિને સ્થાનિક સ્વરાજ્યની બેઠકોની ફાળવણી કરવામાં આવી હતી. તેમજ મતદાર યાદી પણ જાહેર કરવામાં આવી છે.