ઉનાળો આવતાની સાથે જ રસ્તાની બંને બાજુ જ્યુસ વેચનારા જોવા મળે છે. આ રંગબેરંગી જ્યુસ સ્વાસ્થ્ય માટે ખૂબ જ ફાયદાકારક છે પરંતુ જ્યારે વજન ઘટાડવાની વાત આવે ત્યારે ફ્રુટ જ્યુસ સ્વાસ્થ્ય માટે મદદરૂપ છે? જાણો સ્વાસ્થ્ય માટે કયું વધુ ફાયદાકારક છે - જ્યુસ કે ફ્રુટ. સામાન્ય રીતે ફળોનો રસ વધુ સારો છે, તે હાઇડ્રેશનનો ઉત્તમ સ્ત્રોત છે. ઉનાળામાં ત્વરિત ઉર્જા માટે ફળોનો રસ સારો છે.

જો લાંબા સમયથી વજન ઘટાડવાનું વિચારી રહ્યા છો, તો ફળોના રસ કરતાં આખા ફળો વધુ ફાયદાકારક છે. પણ ફળોના રસનું શું?  શું તેઓ કાયમ માટે વજન ઘટાડવામાં મદદ કરી શકે છે?  જ્યારે ફ્રુટ અને ફ્રુટ જ્યુસ બંને આવશ્યક વિટામિન્સ, મિનરલ્સ અને એન્ટીઑકિસડન્ટોથી ભરપૂર હોય છે.

ફ્રુટને સીધા ખાઈ શકો છો અથવા તેનો રસ કાઢીને પણ પી શકો છો. ફળો મિક્સ કરીને પણ તેનું સેવન કરી શકાય છે. પછી ભલે તે લીંબુના રસ સાથે ફ્રૂટ ચાટ હોય કે થોડું સિંધવ મીઠું ભેળવીને મિશ્ર ફળોનો રસનો ગ્લાસ હોય પરંતુ જ્યારે બેમાંથી એક પસંદ કરવાની વાત આવે ત્યારે કયું પસંદ કરવું જોઈએ?

આખા ફળ ખાવાના ફાયદા

આખા ફળ ખાવાથી શરીરને પુષ્કળ પ્રમાણમાં ફાઇબર મળે છે, જે પાચન સુધારવામાં અને બ્લડ સુગરને નિયંત્રિત કરવામાં મદદ કરી શકે છે. તાજા ફળો ખાવાથી શરીરને પુષ્કળ પ્રમાણમાં વિટામિન, એન્ટીઑકિસડન્ટ અને ફાયટોકેમિકલ્સ પણ મળે છે. ફળો ખાવાથી સ્થૂળતા અને ક્રોનિક રોગોનું જોખમ પણ ઓછું થાય છે. ફળો અને શાકભાજી ખાવાથી શરીરને ભરપૂર પોષણ મળે છે. આ ઉપરાંત, ફળો ખાવાથી વજન ઘટાડવામાં પણ મદદ મળે છે. ફળોમાં કેલરી ઓછી હોય છે અને ફાઇબર વધુ હોય છે જે વધુ પડતું ખાધા વિના ઝડપથી તાજગી મેળવવામાં મદદ કરે છે. વજન ઘટાડવામાં મદદ કરી શકે તેવા ફળોમાં બેરી, સફરજન, નાસપતી, સાઇટ્રસ ફળો અને દ્રાક્ષનો સમાવેશ થાય છે.

ફળોના રસના ફાયદા અને નુકસાન

ફળોનો રસ એક અથવા વધુ ફળોને ભેળવીને બનાવવામાં આવે છે. ફળો ખાવાની આ એક સરળ રીત હોય શકે છે. જોકે, રસમાં આખા ફળમાં જોવા મળતા ફાઇબરનો અભાવ હોય છે અને તે આખા ફળના બધા પોષક તત્વો અને એન્ટીઑકિસડન્ટોને જાળવી રાખતો નથી. તેમાં ખાંડ અને કેલરી પણ વધુ હોય શકે છે, ખાસ કરીને જો પેકેજ્ડ જ્યુસ પી રહ્યા હોવ.

વજન ઘટાડવા માટે જ્યુસ પીવું જોઈએ?

ભલે જ્યુસ પીવાને 'સ્વસ્થ' માનવામાં આવે છે, પણ એવો કોઈ દાવો નથી કે જ્યુસ પીવાથી વજન ઘટાડવામાં મદદ મળે છે. વજન ઘટાડવા માટે ફળોનો રસ શ્રેષ્ઠ વિકલ્પ ન હોય શકે. આખા ફળ ખાવાને બદલે જ્યુસ પીવાથી એકંદરે વધુ કેલરીનો વપરાશ થઈ શકે છે. મદદ કરવાને બદલે, તે વજન ઘટાડવાનું વધુ મુશ્કેલ બનાવી શકે છે. ફ્રુટ અને ફ્રુટ જ્યુસ બંને સ્વસ્થ આહારનો ભાગ બની શકે છે. જોકે, આખા ફળોને વધુ સારો વિકલ્પ માનવામાં આવે છે. જો ફળોનો રસ પીવાનું પસંદ કરો છો, તો ખાતરી કરો કે ખાંડ ઉમેર્યા વિના તાજો રસ પસંદ કરો છો.