ઇઝરાયેલે સોમવારે હિઝબુલ્લાહ દ્વારા કરવામાં આવેલા 130 રોકેટ હુમલાનો વળતો જોરદાર જવાબ આપ્યો હતો અને તેના 100 ફાઇટર પ્લેન લેબનોનમાં ઘસી ગયા હતા અને લગભગ 120 સ્થળોને નિશાન બનાવ્યા હતા. ઇઝરાયેલના હિઉમ્લાના પગલે લેબેનોન ફરી ધ્રુજી ઉઠ્યું છે.
લેબનોનમાં ઇઝરાયલી ગ્રાઉન્ડ ઓપરેશન અંગે આઈડીએફએ જણાવ્યું હતું કે, ’અમારા વિમાનોએ વિવિધ હિઝબુલ્લાના એકમોને નિશાન બનાવ્યા હતા. આઈડીએફ અનુસાર, આ હવાઈ હુમલો હિઝબુલ્લાહની કમાન્ડ અને કંટ્રોલ અને ફાયરિંગ ક્ષમતાઓને નષ્ટ કરવા માટે હતો. એક તરફ ઈઝરાયેલમાં 7 ઓક્ટોબરના હુમલાની વરસી પર શોક સભાઓ ચાલી રહી હતી અને બીજી તરફ તેની સેના અનેક મોરચે યુદ્ધ લડી રહી હતી. ઇઝરાયેલે લેબનોનમાં પોતાના ટાર્ગેટને નિશાન બનાવીને રોકેટ છોડ્યા હતા. ગાઝા યુદ્ધમાં અત્યાર સુધીમાં લગભગ 42,000 લોકોના મોત થયા છે. ઇઝરાયેલે વારંવાર કહ્યું છે કે તેણે ગાઝામાં હમાસને અસરકારક રીતે હરાવ્યું છે, ઇઝરાયેલની સૈન્ય કાર્યવાહીમાં વધારો થયો હોવા છતાં, હિઝબુલ્લાએ સોમવારે સમગ્ર દિવસ દરમિયાન 130 થી વધુ રોકેટ છોડ્યા હતા. આમાંથી મોટાભાગના રોકેટે હાઈફાને નિશાન બનાવ્યું હતું.
ઇઝરાયેલી સૈન્યએ જણાવ્યું હતું કે લેબનોનથી હિઝબુલ્લાહ દ્વારા છોડવામાં આવેલા કેટલાક રોકેટને આયર્ન ડોમ દ્વારા અટકાવવામાં આવ્યા હતા અને તેનો નાશ કરવામાં આવ્યો હતો, જ્યારે બાકીના ખાલી વિસ્તારોમાં પડ્યા હતા. ઈઝરાયેલ હવે આકરા પાણીએ છે અને કોઈપણ સમયે ઈરાન સામે જવાબી હુમલો કરી શકે છે. તે જ સમયે, તેહરાને પુનરોચ્ચાર કર્યો છે કે તે તેની ધરતી પર કોઈપણ ઇઝરાયેલી હુમલાનો જવાબ આપશે, આ વધતા સંઘર્ષમાં અમેરિકા પણ સામેલ થવાની સંભાવના છે. તે ઇઝરાયેલને નોંધપાત્ર લશ્કરી અને રાજદ્વારી સહાય પૂરી પાડે છે.