આખું ભારત એ જાણવા આતુર છે કે ઈશાન કિશન ટીમ ઈન્ડિયામાં ક્યારે વાપસી કરશે? ઈશાન કિશન ક્યારે ફરીથી બ્લુ કે વ્હાઈટ જર્સી પહેરીને ટીમ ઈન્ડિયા માટે રમતા જોવા મળશે?  ઈશાન કિશન, જે 5 સપ્ટેમ્બરથી દુલીપ ટ્રોફીમાં રમવાનો હતો. તે ટૂર્નામેન્ટની પ્રથમ મેચમાંથી બહાર થઈ ગયો છે. પ્રાપ્ત માહિતી અનુસાર તે કદાચ પ્રથમ મેચમાં રમતા જોવા નહીં મળે.

શું છે ઈશાનની ઈજા બહાર થવાનું કારણ

શું ઈશાન કિશન પહેલી મેચ નહીં રમી શકે કે પછી આગળ પણ રમશે નહીં? હાલમાં આવા પ્રશ્નોના જવાબો અંગે કોઈ સત્તાવાર માહિતી નથી. જોકે, મળેલી માહિતી અનુસાર ઈશાન કિશનના દુલીપ ટ્રોફીની પ્રથમ મેચમાંથી બહાર થવા પાછળનું કારણ ઈજા સંબંધિત હોઈ શકે છે.

દુલીપ ટ્રોફીમાં ઈશાન કિશનનું સ્થાન કોણ લેશે?

ઈશાન કિશન દુલીપ ટ્રોફીમાં શ્રેયસ અય્યરની આગેવાની હેઠળની ઈન્ડિયા ડી ટીમનો એક ભાગ છે. હવે જો તે પ્રથમ મેચ નહીં રમે તો આ ટીમમાં તેની જગ્યાએ સંજુ સેમસનનો સમાવેશ કરવામાં આવી શકે છે. અગાઉ જ્યારે દુલીપ ટ્રોફી માટે ટીમોની જાહેરાત કરવામાં આવી હતી ત્યારે સંજુ સેમસનને કોઈપણ ટીમમાં સ્થાન મળ્યું ન હતું.

બાંગ્લાદેશ સામેની શ્રેણીમાં વાપસી કરવી મુશ્કેલ

ઇશાન કિશન દુલીપ ટ્રોફીની આગળની મેચોમાં રમશે કે નહીં તે અંગે હજુ કંઇ સ્પષ્ટ નથી. સવાલ એ પણ છે કે શું તેની ભારત-બાંગ્લાદેશ ટેસ્ટ શ્રેણી માટે પસંદગી થશે? આ શ્રેણી માટે પસંદગી દુલીપ ટ્રોફીની પ્રથમ મેચ બાદ જ થવાની છે. પરંતુ ઈશાન કિશનના પ્રથમ મેચમાંથી બહાર હોવાના સમાચાર બાદ એવું લાગતું નથી કે તેની બાંગ્લાદેશ સામેની શ્રેણી માટે પસંદગી થઈ શકે છે.

હવે, જો ઇશાન કિશન બાંગ્લાદેશ સામેની ટેસ્ટ શ્રેણી માટે પસંદ ન થાય અને પાછળ રહે તો આશા રાખી શકાય કે તે દુલીપ ટ્રોફીની આગળની મેચોમાં રમતા જોવા મળી શકે છે. શ્રેયસ અય્યરની કપ્તાનીવાળી ટીમ ડી 12 સપ્ટેમ્બરથી બીજી મેચ રમવાની છે.

ઇશાન કિશન ભલે દુલીપ ટ્રોફીની પ્રથમ મેચમાં રમતા જોવા ન મળે. પરંતુ આ પહેલા રમાયેલી બૂચી બાબુ ટૂર્નામેન્ટમાં તેણે શાનદાર પ્રદર્શન કર્યું હતું. ત્યાં તેણે મધ્યપ્રદેશ સામેની પહેલી જ મેચમાં 86 બોલમાં સદી ફટકારી હતી. તે ઇનિંગ્સ ઇશાનનું વર્તમાન ફોર્મ દર્શાવે છે પરંતુ તે તેને ટીમ ઇન્ડિયામાં પરત લાવશે કે કેમ તે કહી શકાય નહીં.