ભારતીય મૂળની અવકાશયાત્રી સુનીતા વિલિયમ્સ ફરી એકવાર અવકાશમાં ઉડાન ભરવા જઈ રહી છે. તે બોઇંગના સ્ટારલાઇનર અવકાશયાનમાં બેસીને અવકાશમાં જશે. જે આજે રાત્રે 10 વાગ્યે ફ્લોરિડામાં કેનેડી સ્પેસ સેન્ટરથી ઉપડશે. આ પહેલા 7 મેના રોજ તે અવકાશમાં જવા માટે નીકળવાના હતા પરંતુ અવકાશયાનના ઓક્સિજન વાલ્વમાં ટેકનિકલ ખામીને કારણે આ યાત્રા મોકૂફ રાખવામાં આવી હતી.

અમેરિકાની સ્પેસ એજન્સી નાસાએ કહ્યું હતું કે જો બધુ બરાબર રહેશે, તો સ્ટારલાઈનર ઈન્ટરનેશનલ સ્પેસ સ્ટેશન પર ડોક કરશે, ત્યારબાદ સુનિતા વિલિયમ્સ અને બૂચ વિલ્મોર તેમના સાથીદારો સાથે સ્ટારલાઈનર સ્પેસક્રાફ્ટ અને તેની સબ-સિસ્ટમનું પરીક્ષણ કરવા માટે લગભગ એક સપ્તાહ સુધી સ્ટેશન પર રહેશે.

સુનિતા વિલિયમ્સના રેકોર્ડ

સુનિતા વિલિયમ્સે અવકાશમાં 322 દિવસ વિતાવ્યા છે અને સૌથી વધુ કલાકો સુધી સ્પેસવોક કરનાર મહિલા વૈજ્ઞાનિક હોવાનો રેકોર્ડ ધરાવે છે. તે પહેલીવાર 9 ડિસેમ્બર, 2006ના રોજ અવકાશમાં ગયા હતા અને 22 જૂન, 2007 સુધી અવકાશમાં રહ્યા હતા. સુનીતા વિલિયમ્સે રેકોર્ડ 29 કલાક અને 17 મિનિટ સુધી ચાર વખત સ્પેસવોક કર્યું હતું. તે પછી સુનિતા વિલિયમ્સ 14 જુલાઈ 2012ના રોજ બીજી વખત અવકાશ યાત્રા પર ગયા અને 18 નવેમ્બર 2012 સુધી અવકાશમાં રહ્યા. 59 વર્ષીય સુનિતા વિલિયમ્સે કહ્યું કે તે ઉડાન પહેલા થોડી નર્વસ હતી, પરંતુ તે નવા અવકાશયાનમાં ઉડાન ભરવાને લઈને ઉત્સાહિત પણ હતી. વિલિયમ્સે કહ્યું કે ઇન્ટરનેશનલ સ્પેસ સ્ટેશન તેમના માટે બીજા ઘર જેવું છે.