દેશની 'આત્મનિર્ભર ભારત' પહેલને પ્રોત્સાહન આપવા માટે ભારતીય સેનાએ 550 'ASMI' મશીન પિસ્તોલ નોર્ધન કમાન્ડમાં સામેલ કરી છે. આ હથિયાર ભારતીય સેનાના કર્નલ પ્રસાદ બંસોડ દ્વારા ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) સાથે મળીને તૈયાર કરવામાં આવ્યું છે. તે હૈદરાબાદની લોકેશ મશીન કંપની દ્વારા બનાવવામાં આવી રહી છે. આ પિસ્તોલ સંપૂર્ણપણે સ્વદેશી છે, જે આત્મનિર્ભર ભારત તરફ એક મહત્વપૂર્ણ પગલું છે.

કોમ્પેક્ટ અને વિશ્વસનીય હથિયાર

'ASMI' મશીન પિસ્તોલ એક મજબૂત, કોમ્પેક્ટ અને વિશ્વસનીય હથિયાર છે, જે નજીકની લડાઇ અને વિશેષ કામગીરી માટે રચાયેલ છે. તેની અનોખી અર્ધ-બુલપપ ડિઝાઇન તેને પિસ્તોલ અને સબમશીન ગન બંને તરીકે એકલા હાથે ચલાવવાની મંજૂરી આપે છે. આ 100 ટકા મેડ-ઇન-ઈન્ડિયા શસ્ત્રોનો સમાવેશ સંરક્ષણ ઉત્પાદનમાં દેશને આત્મનિર્ભરતા તરફ લઈ જવા માટે આત્મનિર્ભર ભારત પ્રત્યે ભારતીય સેનાની અતૂટ પ્રતિબદ્ધતાને પ્રતિબિંબિત કરે છે.

અસ્મી પિસ્તોલની વિશેષતાઓ

આતંકવાદીઓ વિરુદ્ધ ઓપરેશન માટે આવી નાની મશીન પિસ્તોલની ખૂબ જરૂર છે. તે 100 મીટર સુધી ચોક્કસ લક્ષ્ય રાખી શકે છે. તેના એક મેગેઝીનમાં 33 ગોળીઓ છે. તેના પર ટેલિસ્કોપ, લેસર બીમ, દૂરબીન સરળતાથી ઇન્સ્ટોલ કરી શકાય છે, જે ઓપરેશનને ખૂબ જ સરળ બનાવે છે. ખાસ વાત એ છે કે આ મશીન પિસ્તોલની લોડિંગ સ્વીચ બંને બાજુ હોય છે, એટલે કે ડાબા હાથે હોય કે જમણા હાથે બંને માટે આ પિસ્તોલ ચલાવવામાં સરળતા રહે છે.

આતંકવાદીઓ સામે ઓપરેશન

આ સિવાય પિસ્તોલના બટને ફોલ્ડ કરી શકાય છે, જેના કારણે તેની સાઈઝ વધારી કે ઘટાડી શકાય છે. તેને સરળતાથી છુપાવીને લઈ જઈ શકાય છે અને તેનો ઉપયોગ પિસ્તોલ તરીકે પણ થઈ શકે છે. એટલું જ નહીં, રાઈફલની જેમ તેને ખભા પર રાખીને પણ ફાયર કરી શકાય છે. નોર્ધન કમાન્ડમાં શહેરી વિસ્તારોમાં આતંકવાદીઓ વિરુદ્ધ ઓપરેશન માટે આ શ્રેષ્ઠ હથિયાર છે.