પોરબંદરના બરડા પંથકના ગામડાઓમાંથી પસાર થતી વર્તુ નદીના પાણીને લીધે જમીન અને લોકોની મિલ્કતને ખૂબ મોટું નુકસાન થયું છે ત્યારે કોંગ્રેસ દ્વારા આ વિસ્તારમાં થયેલ નુકસાનીનો તાત્કાલિક સર્વે કરીને વળતર ચૂકવવા મુખ્યમંત્રીને રજૂઆત કરવામાં આવી છે.  પોરબંદર જિલ્લા કોંગ્રેસના પ્રમુખ રાજુભાઈ ઓડેદરા એ જણાવ્યું હતું કે પોરબંદરના બરડા પંથકના ગામડાઓ સોઢાણાથી ફટાણાથી શીંગડા સીમને જોડતા વર્તુ નદીનો કાંઠાળ વિસ્તારનો રસ્તો ભયંકર નુકશાન પામ્યો છે જેના કારણે વાહન ચલાવવામાં પણ જાનનું જોખમ હોય તેવી પરિસ્થિતિ ઉભી થઈ છે. તો ફટાણાના વિસ્તારમાં અનેક જગ્યાએ મોટા પ્રમાણમાં જમીનનું ધોવાણ થયું છે અને ખેતરોમાં પાકને નુકસાન થયું છે તેથી રાજ્ય સરકાર આ બાબતને ગંભીરતાથી લઈને વહેલી તકે સર્વે કરાવે તેવી કોંગ્રેસ દ્વારા માંગ થઈ છે.