વાંકાનેર તાલુકાના રાતીદેવળી ગામ ખાતે આજે પુન: પીવાના પાણીની માંગ પારાયણ સર્જાઈ હતી. જેમાં ગ્રામજનો ફરી એકવાર રોડ પર ઉતરી આવી વાંકાનેર-જડેશ્ર્વર મુખ્ય માર્ગ બંધ કરી દેતાં ચકકાજામ થયો હતો. જેના કારણે અહીંથી પસાર થતાં વાહનચાલકો હેરાન પરેશાન થઈ ગયા હતા. જેમાં પોલીસની સમજાવટથી બે કલાકે ટ્રાફિક ક્લિયર કરાવવામાં આવ્યો હતો. 

પ્રાપ્ત માહિતી મુજબ વાંકાનેર તાલુકાના રાતીદેવરી ગામની મહિલાઓ દ્વારા થોડા દિવસ પહેલા પીવાના પાણી પ્રશ્ર્ને બેડા સાથે રોડ પર ઉતરી આવી ચકકાજામ કર્યો હતો. જે બાદ પણ તેની સમસ્યા હલ ન થતાં આજે પુન: ગ્રામજનો ફરી આજ રસ્તે ચાલી ચકકાજામ કર્યો હતો. જેમાં પોલીસ ટીમ તાત્કાલીક ઘટનાસ્થળે દોડી જઈ સીપીઆઈ વી.પી.ગોલની સમજાવટ બાદ બે કલાકની મથામણના અંતે ચકકાજામ દુર કરાયો હતો.