રાજકોટમાં દિવસેને દિવસે આવારા તત્વો આતંક વધી રહ્યો છે. ત્યારે આજે ફરી એકવાર એવી ઘટના સામે આવી છે.રાજકોટના સ્વામિનારાયણ ચોક નજીક ગઈકાલે રાતે કેટલાક યુવાનો રસ્તો બંધ કરીને જાહેરમાં જન્મદિવસની ઉજવણી કરી રહ્યા હતા. આ અંગેની જાણ થતાં માલવીયાનગર પોલીસની ટીમ ઘટના સ્થળે પહોંચી હતી. પોલીસે જાહેરમાં બર્થ ડે પાર્ટીની ઉજવણી કરનારાઓને સમજાવવા પ્રયાસ કર્યો હતો. જેથી ઉશ્કેરાઈને કેટલાક યુવાનોએ પોલીસ પર હુમલો કર્યો હતો. જે બાદ ઘટના સ્થળે પોલીસે ચુસ્ત બંદોબસ્ત ગોઠવી દીધો હતો. સાથે રાજકોટના માલવીયાનગર પોલીસ સ્ટેશનમાં 9 લોકો વિરુદ્ધ મારામારી તેમજ ટોળામાં એકઠા થઈ પોલીસ પર હુમલાનો ગુનો નોંધાયો હતો. 9 પૈકી 4 આરોપીની ધરપકડ કરી છે.મુખ્ય આરોપી વિશાલ ઉર્ફે રોકી અને તેનો ભાઈ ઈશાન જોશી સહીત 5 આરોપી ફરાર છે.આરોપીઓની શોધખોળ ચાલુ છે.