એસજી હાઇવે પર ગેરકાયદેસર પાર્કિંગને લઈને તંત્રએ લાલ આંખ કરી છે. દક્ષિણ પશ્ચિમ ઝોન એસ્ટેટ વિભાગ દ્વારા આજે (તા. 25/04/2025) કર્ણાવતી ક્લબની સામે આવેલી ઇસ્કોન ગાંઠિયા, કર્ણાવતી સ્નેક્સ, રજવાડી ચા, ગાત્રાળ ટી સ્ટોલ, ગજાનંદ પૌંઆ હાઉસ સહિત 12 દુકાનોને સીલ કરી દેવામાં આવી છે. આ કાર્યવાહી દુકાનો દ્વારા તેમના ગ્રાહકો માટે પાર્કિંગની યોગ્ય વ્યવસ્થા નહીં કરવાના કારણે કરવામાં આવી છે.

મળતી માહિતી અનુસાર એસ્ટેટ વિભાગ દ્વારા આ દુકાનોને તેમના ગ્રાહકો માટે પાર્કિંગની વ્યવસ્થા કરવા માટે લેખિત તેમજ મૌખિક સૂચનાઓ વારંવાર આપવામાં આવી હતી. દુકાનદારોએ પાર્કિંગની વ્યવસ્થા કરવા માટે બાંહેધરી પણ આપી હતી, પરંતુ તેમ છતાં કોઈ નક્કર પગલાં લેવામાં આવ્યા નહોતા. જેના પરિણામે એસજી હાઇવે પર વાહનોના પરિવહનમાં ભારે મુશ્કેલી સર્જાતી હતી. ટ્રાફિકની સમસ્યાને ધ્યાનમાં રાખીને અને વાહનોની અવરજવર સરળ બનાવવા માટે આખરે એસ્ટેટ વિભાગે કડક કાર્યવાહી કરતા 12 દુકાનોને સીલ મારી દીધી છે.

સ્થાનિકોના જણાવ્યા અનુસાર એસજી હાઇવે પર કર્ણાવતી ક્લબની સામે દરરોજ સાંજે ટ્રાફિકની ભારે સમસ્યા સર્જાય છે. સર્વિસ રોડ પર બંને તરફ વાહનોની લાંબી કતારો લાગી જાય છે અને 100 મીટર સુધી વાહનોનો ખડકલો જોવા મળે છે. લોકો પોતાની ગાડીઓ રોડ પર ગમે ત્યાં પાર્ક કરીને જતા રહેતા હોવાથી આ સમસ્યા વધુ વકરી હતી.

એસ્ટેટ વિભાગે સ્પષ્ટ ચેતવણી આપી છે કે શહેરના અન્ય વિસ્તારોમાં પણ જો ખાણીપીણીની દુકાનો કે કોમ્પ્લેક્સમાં પાર્કિંગની યોગ્ય વ્યવસ્થા નહીં હોય તો તેમની સામે પણ આ પ્રકારની સીલિંગની કાર્યવાહી કરવામાં આવશે. તંત્ર હવે ગેરકાયદેસર પાર્કિંગને લઈને કોઈ પણ પ્રકારની બાંધછોડ કરવાના મૂડમાં નથી અને ટ્રાફિકની સમસ્યાને નાથવા માટે કડક પગલાં ભરવા માટે તૈયાર છે.