૨ ગંભીર : ઇજાગ્રસ્તોને ૧૦૮ દ્વારા લાલપુર-ભાણવડ હોસ્પીટલ ખસેડાયા

લાલપુરના મેમાણા ગામનો પરિવાર આજે સવારે સગાઇનો પ્રસંગ હોવાથી  આઇસર ગાડીમાં બેસીને જઇ રહયા હતા દરમ્યાન ધારાગઢ ફાટક નજીક પહોચતા મીની ટ્રક પલ્ટી ખાઇ જતા અંદર બેઠેલા ૧૪ને નાની મોટી ઇજાઓ થઇ હતી, બનાવની જાણ થતા ૧૦૮ની ટુકડી દોડી ગઇ હતી અને તમામ ઇજાગ્રસ્તોને લાલપુર સીએચસી સેન્ટર તથા ભાણવડ ખાતે ખસેડવાની કાર્યાવહી હાથ ધરી હતી.
લાલપુર તાલુકાના મેમાણા ગામના પરિવારના સભ્યો આજે સવારે સગાઇના પ્રસંગ નિમીતે આઇસર ગાડીમાં બેસીને જઇ રહયા હતા ત્યારે ધારાગઢ ફાટક પાસે પહોચતા આઇસર પલ્ટી મારી જતા અંદર બેઠેલા ૧૨ થી ૧૪ લોકોને ઇજાઓ પહોચી હતી, અકસ્માતના કારણે દેકારો બોલી ગયો હતો અને આજુબાજુના લોકો પણ મદદ માટે દોડયા હતા.
અકસ્માત અંગે ૧૦૮ને જાણ કરતા તમામ ઇજાગ્રસ્તોને એમ્બ્યુલન્સ મારફત લાલપુર સીએચસી ખાતે ખસેડવામાં આવ્યા હતા જયાં તાબડતોબ સારવાર આપવામાં આવી હતી, ઇજાગ્રસ્તો પૈકી ૨ વ્યકિતને ગંભીર ઇજા થઇ હોવાનું પ્રાથમિક રીતે જાણવા મળ્યું છે. આ બંને ઇજાગ્રસ્તોને ભાણવડ હોસ્પીટલ ખાતે સારવારમાં લઇ જવામાં આવ્યા હતા, અકસ્માતના પગલે પોલીસની ટુકડી પણ દોડતી થઇ હતી અને વધુ વિગતો મેળવવા માટે તપાસ હાથ ધરી છે.