લખનૌ સુપર જાયન્ટ્સ અને રોયલ ચેલેન્જર્સ બેંગલુરુ વચ્ચેની મેચ સાથે લીગ ફરી શરૂ થશે: સૂત્રો: અંતિમ શેડ્યૂલ આજે જાહેર થઇ શકે

ભારત-પાકિસ્તાન સૈન્ય સંઘર્ષને કારણે સસ્પેન્ડ આઈપીએલ 16 અથવા 17 મેના રોજ ફરીથી શરૂ થવાની તૈયારીમાં છે અને ફાઇનલ કોલકાતાની બહાર ખસેડવામાં આવે તેવી શક્યતા છે. શનિવારે યુદ્ધવિરામની જાહેરાતથી લીગને ફરી શરૂ કરવાનો માર્ગ મોકળો થયો હતો જે 9 મેના રોજ એક સપ્તાહ માટે સ્થગિત કરવામાં આવી હતી. આઈપીએલ ગવર્નિંગ કાઉન્સિલના સભ્યો અને અધિકારીઓના બીસીસીઆઈએ ગઈકાલે પુન: શરૂ કરવાની યોજના અંગે ચર્ચા કરી હતી. બીસીસીઆઈના ઉપાધ્યક્ષ રાજીવ શુક્લાએ કહ્યું કે બોર્ડ હજુ પણ યોગ્ય શેડ્યૂલ બનાવવા પર કામ કરી રહ્યું છે.

હાલ સુધી આઈપીએલ પર કોઈ નિર્ણય નથી. બીસીસીઆઈના અધિકારીઓ ઉકેલો પર કામ કરી રહ્યા છે. બીસીસીઆઈના સચિવએ જણાવ્યું હતું કે આઈપીએલના અધ્યક્ષ ફ્રેન્ચાઈઝીઓ અને દરેક સાથે વાતચીત કરી રહ્યા છે, તેથી ખૂબ જ ટૂંક સમયમાં નિર્ણય વિશે જાણ થઈ જશે, ટૂર્નામેન્ટને વહેલી તકે ફરી શરૂ કરવાના પ્રયાસો કરવામાં આવી રહ્યા છે. આઈપીએલના એક સૂત્રએ જણાવ્યું હતું કે લખનૌ સુપર જાયન્ટ્સ અને રોયલ ચેલેન્જર્સ બેંગલુરુ વચ્ચેની મેચ સાથે લીગ ફરી શરૂ થશે જે અગાઉ 9 મેના રોજ રમાવાની હતી.

સૂત્રએ જણાવ્યું હતું કે તમામ ટીમોને તેમના ખેલાડીઓને પાછા બોલાવવા માટે કહેવામાં આવ્યું છે, ટૂર્નામેન્ટ 16 અથવા 17 મેના રોજ લખનૌમાં ફરીથી શરૂ થશે. અંતિમ શેડ્યૂલ આજે જાહેર થઇ શકે.