રાહુલ ગાંધીનો જેપી નડ્ડા ને પત્ર: કોંગ્રેસના સાંસદ અને લોકસભામાં વિરોધ પક્ષના નેતા રાહુલ ગાંધીએ દિલ્હી એઈમ્સની સુવિધાઓ અંગે ચિંતા વ્યક્ત કરી છે. તેમણે કેન્દ્રીય આરોગ્ય પ્રધાન જેપી નડ્ડા અને દિલ્હીના મુખ્યમંત્રી આતિશીને પત્ર લખીને દર્દીઓ અને તેમના પરિવારો માટે સારી સુવિધાઓની માંગ કરી.

રાહુલ ગાંધીએ કહ્યું, “દેશભરમાંથી દિલ્હી એઈમ્સમાં આવતા દર્દીઓ અને તેમના પરિવારોને વધુ સારી સુવિધાઓ પૂરી પાડવા માટે દિલ્હીના મુખ્યમંત્રી અને કેન્દ્રીય આરોગ્ય પ્રધાનને પત્ર લખવામાં આવ્યો છે. તાજેતરમાં મેં જોયું કે આ લોકોને ઠંડીમાં મેટ્રો સ્ટેશન નીચે સૂવાની ફરજ પાડવામાં આવે છે, જ્યાં પીવાના પાણી કે શૌચાલયની કોઈ વ્યવસ્થા નથી. આસપાસ કચરાના ઢગલા પણ પડેલા છે."

'દર્દીઓને આરોગ્ય સુવિધાઓ મળી રહી નથી'

કોંગ્રેસ નેતાએ આગળ લખ્યું, “દિલ્હી એઈમ્સમાં આટલી મોટી સંખ્યામાં દર્દીઓનું આગમન એ પણ દર્શાવે છે કે લોકોને તેઓ જ્યાં રહે છે ત્યાં સસ્તી અને સારી ગુણવત્તાવાળી આરોગ્ય સુવિધાઓ મળી રહી નથી. મને આશા છે કે મારા પત્રને ધ્યાનમાં લઈને, દિલ્હીના મુખ્યમંત્રી અને કેન્દ્રીય આરોગ્ય પ્રધાન આ માનવતાવાદી સંકટને ઉકેલવા માટે તાત્કાલિક પગલાં લેશે. એવી પણ આશા છે કે કેન્દ્ર સરકાર આગામી બજેટમાં જાહેર આરોગ્યસંભાળ વ્યવસ્થાને મજબૂત બનાવવા માટે નક્કર પગલાં લેશે અને તેના માટે જરૂરી સંસાધનોમાં વધારો કરશે.

રાહુલ ગાંધીએ એઇમ્સ અને તેની આસપાસના વિસ્તારોની મુલાકાત લીધી છે

આ પહેલા રાહુલ ગાંધીએ એઈમ્સ અને તેની આસપાસના વિસ્તારોની મુલાકાત લીધી હતી. તેમણે આનો વીડિયો પણ શેર કર્યો. તેમણે કહ્યું હતું, “એઈમ્સની બહાર નર્ક. દેશભરના ગરીબ દર્દીઓ અને તેમના પરિવારોને ઠંડી, ગંદકી અને ભૂખમાં એઈમ્સની બહાર સૂવાની ફરજ પડે છે. તેમની પાસે છત નથી, ખોરાક નથી, શૌચાલય નથી અને પીવાનું પાણી નથી. મોટા દાવા કરતી કેન્દ્ર સરકાર અને દિલ્હી સરકારે આ માનવતાવાદી સંકટ પ્રત્યે આંખ આડા કાન કેમ કર્યા છે?”