અચાનક કારની બ્રેક ફેઇલ થવાને કારણે મોટી સમસ્યા ઉદ્ભવી શકે છે. આ સ્થિતિમાં લોકોના જીવ જવાનો ભય છે. જ્યારે કારની બ્રેક ફેઇલ થઈ જાય છે. ત્યારે લોકો ગભરાવા લાગે છે અને કોઈપણ રીતે કારમાંથી બહાર નીકળવાનો પ્રયત્ન કરે છે.

બ્રેક ફેઈલ થઇ જાય ત્યારે કેટલાક લોકો જીવ બચાવવા માટે ચાલતા વાહનમાંથી કૂદી પડે છે. તો કેટલાક લોકો કારને રોકવા માટે તેમની કારને થાંભલા, દિવાલ અથવા કોઈપણ મોટી વસ્તુ સાથે ભટકાડી દે છે. જેથી કારની ગતિ ધીમી પડી જાય છે. કેટલાક લોકો અચાનક હેન્ડબ્રેક ખેંચે છે પરંતુ  જીવ બચાવવાની આવી ઉતાવળમાં લોકોના જીવ પણ જઈ શકે છે અથવા વ્યક્તિને ગંભીર ઈજાઓ પણ થઈ શકે છે.

કારની બ્રેક ફેઇલ થાય તો જીવ કેવી રીતે બચાવવો?

જો કારની બ્રેક ફેલ થઈ જાય તો કારમાંથી કૂદી જવાની કે કોઈ વસ્તુ સાથે અથડાવાની જરૂર નથી.

        સૌથી પહેલા તમારે કારમાં લગાવેલ હેઝાર્ડ વોર્નિંગ લાઈટ્સનું બટન તરત જ ઓન કરવું જોઈએ. જેથી તમારી આસપાસ ડ્રાઈવિંગ કરતા લોકો તમારી કારના ઈન્ડિકેટર્સ પરથી જાણી શકે કે તમારી કારમાં કોઈ ખામી છે.

પછી સ્ટીયરિંગ વ્હીલને ફક્ત એક હાથથી નિયંત્રિત કરો, જેથી તમે ખોટી દિશામાં વાહન ન ચલાવો અને કોઈ અકસ્માત ન થાય.

        ત્યારબાદ મિકેનિકલ હેન્ડબ્રેકને બીજા હાથથી પકડી રાખો અને મિકેનિકલ હેન્ડબ્રેકનું બટન અંદરની તરફ દબાવો અને તેને ઉપર અને નીચે ખસેડતા રહો. આ રીતે હેન્ડબ્રેકને ઘણી વખત ઉપર અને નીચે ખસેડો. એટલે કાર ટૂંક સમયમાં બંધ થઈ જશે.

ઈલેક્ટ્રોનિક હેન્ડબ્રેકથી કાર કેવી રીતે અટકશે?

જો વાહનમાં ઈલેક્ટ્રોનિક હેન્ડબ્રેકની સુવિધા છે, તો તેને સતત ખેંચતા રહો. આ તમારી કારને આદેશ મોકલશે કે તમારી કાર મુશ્કેલીમાં ફસાઈ છે, જેના કારણે બ્રેક લગાવવામાં આવશે. પરંતુ અહીં એ નોંધનીય છે કે ઈલેક્ટ્રોનિક હેન્ડબ્રેકને સતત ખેંચીને રાખવાની હોય છે. જો વારંવાર સ્વીચ ઓન કે ઓફ કરો છો, તો આ આદેશ વાહનને મોકલવામાં આવશે કે તમે આ સુવિધાનો યોગ્ય રીતે ઉપયોગ કરી શકતા નથી. જેના કારણે વાહન બંધ થશે નહીં.

આ પગલાંને અનુસરીને તમે તમારું જીવન અને તમારી સાથે મુસાફરી કરતા લોકોનો જીવ બચાવી શકો છો.