કુચીયાદડ ગામ નજીક હિટ એન્ડ રનની ઘટના બની હતી. જેમાં અજાણ્યા વાહન ચાલકે અહીં ઓવરબ્રિજ નજીક સર્વિસ રોડ પાસે યુવાનને લેતા યુવાનનું ગંભીર ઇજા થવા સબબ ઘટનાસ્થળે જ મોત થયું હતું.બનાવ અંગે એરપોર્ટ પોલીસ દ્વારા આ યુવાનની ઓળખ મેળવવા તેના વાલીવારસની શોધખોળ શરૂ કરવામાં આવી છે. અકસ્માત સર્જનાર વાહનચાલકની ઝડપી લેવા તપાસ હાથ ધરી છે.

અકસ્માતના આ બનાવની જાણવા મળતી વિગતો મુજબ, એરપોર્ટ પોલીસ સ્ટેશનમાં ફરજ બજાવતા પીએસઆઇ એસ.એસ. જાડેજાએ નોંધાવેલી પોલીસ ફરિયાદમાં જણાવ્યું હતું કે, ગત તા.13/5 ના તેઓ ફરજ પર હતા ત્યારે પીએસઓ દ્વારા જાણ કરવામાં આવી હતી કે,કુચીયાદડ ગામ પાસે આવેલ મધુભાઈ ગોવર્ધનભાઈ ચેવડાવાળાના ફેક્ટરીના આઉટલેટ ગોડાઉન સામે રાજકોટ અમદાવાદ નેશનલ હાઈવે રોડ પર સાતડા ગામના પાટીયાથી કુચીયાદડ ગામના ઓવરબ્રિજ તરફ જતા સર્વિસ રોડ પર એક અજાણ્યો પુરુષ (ઉ.વ 25) વાળો ઇજાગ્રસ્ત હાલતમાં પડ્યો હોય જેને 108 ના ઇએમટીએ જોઈ તપાસી મૃત જાહેર કર્યો છે. જેથી પીએસઆઇ જાડેજા તાકીદે અહીં પહોંચ્યા હતા અને જરૂરી કાર્યવાહી કરી મૃતદેહને પીએમ માટે સિવિલ હોસ્પિટલ ખસેડ્યો હતો.

બનાવ અંગે પીએસઆઇની ફરિયાદ પરથી અજાણ્યા વાહન ચાલક સામે ગુનો નોંધવામાં આવ્યો છે. પોલીસ દ્વારા યુવાનની ઓળખ મેળવવા માટે તેના વાલીવારસની શોધખોળ શરૂ કરી છે. જ્યારે અકસ્માત સર્જી નાસી ગયેલા વાહન ચાલકને ઝડપી લેવા અહીં હાઇવે પરના સીસીટીવી ફૂટે ચકાસવામાં આવી રહ્યા છે. યુવાન અંગે માહિતી હોય તો એરપોર્ટ પોલીસ સ્ટેશનના નં.૬૩૫૯૬૨૮૭૯૯ અથવા તપાસનીશ અધિકારીના પીએસઆઈ એસ.એસ.જાડેજાના મો.ન. ૯૬૨૪૨૬૭૮૭૬ ઉપર સંપર્ક કરવા જણાવાયું છે.