ગુજરાતમાં છેલ્લા બે દિવસથી ગરમીનો પ્રકોપ જોવા મળી રહ્યો છે. સુરેન્દ્રનગર 42.8 ડિગ્રી સાથે રાજ્યનું સૌથી ગરમ શહેર બન્યું છે. 14 જિલ્લાઓમાં તાપમાન 40 ડિગ્રીને પાર પહોંચ્યું છે. અમરેલી, ભાવનગર, કચ્છ, સુરત અને બનાસકાંઠામાં વોર્મ નાઈટની આગાહી કરવામાં આવી છે, એટલે કે આ જિલ્લાઓમાં રાત્રે પણ ગરમીનું પ્રમાણ વધુ રહેશે. રાત્રે પણ 30 ડિગ્રીથી વધુ તાપમાન રહેવાથી લોકોને ઊંઘવામાં મુશ્કેલી પડી શકે છે.

આ વર્ષે ફેબ્રુઆરીમાં વારંવાર સક્રિય થયેલા વેસ્ટર્ન ડિસ્ટર્બન્સ અને માર્ચમાં સક્રિય થયેલી એેન્ટિ સાઈક્લોનિક સર્ક્યુલેશનની સિસ્ટમની અસરથી માર્ચના પ્રથમ અઠવાડિયાથી જ રાજ્યમાં આકરી ગરમી શરૂ થઈ છે. આ સિસ્ટમની અસરથી હીટવેવનું મોજું ફરી વળ્યું છે, જેના કારણે માર્ચમાં ગરમીનો પારો ગત વર્ષ કરતાં 16 દિવસ પહેલાં 40 ડિગ્રીએ પહોંચ્યો છે. હવામાન વિભાગે આજે રેડ એલર્ટ અને બુધવારે ઓરેન્જ એલર્ટ આપ્યું છે.

જ્યારે દિવસની સાથે રાતના તાપમાનમાં પણ વધારો થાય છે, ત્યારે તેને વોર્મ નાઈટ કહેવામાં આવે છે. આ સ્થિતિમાં રાતનું તાપમાન 30 ડિગ્રીથી વધુ થઈ જાય છે અને હવા ઠંડી થતી નથી. જેને કારણે રાત્રે પણ ભારે ગરમીનો અહેસાસ થાય છે.