મહાપાલિકાના આરોગ્ય વિભાગે તહેવારોના લીધે દુધની બનાવટ, ખાદ્ય પદાર્થોના નમૂના લીધા હતા. અગાઉ પનીરના નમૂના લેવાયા હતા, તે બંને ફેલ થતા કોર્ટમાં કેસ દાખલ કરાયો હતો, જે કેસમાં ભેળસેળ કરનાર બંને પેઢીને હજારો રૂપિયાનો દંડ ફટકારવામાં આવ્યો હતો.
નવરાત્રીના તહેવારો તેમજ ફુડ સેફ્ટી પખવાડીયાના અનુસંધાને ભાવનગર મહાનગરપાલિકાના ફુડ સેફ્ટી વિભાગ દ્વારા દુધ, દુધની બનાવટ, મીઠાઈ, મીઠો માવો, તેલ વગેરેના કુલ ૬૦ નમુનાઓ લેવામાં આવ્યા હતા, જેમા દુધ ના -૭, દુધની બનાવટના -૫, તેલ ના - ૧૪ મીઠો માવો અને બરફી ના -૧૪, ટોસ્ટ ના ૬, કુકીઝ ના ૪ તથા અન્ય ખાધ ચીજના - ૨૦ નમુનાઓ લેવામા આવ્યા હતા. જે નમુનાઓ પૃથ્થકરણ માટે સરકારી લેબોરેટરીમાં મોકલી આપવામાં આવ્યા હતા.
આ ઉપરાંત રસીદભાઈ લાકડીયા, રૂવાપરી પાસેથી પનીરનો નમુનો અગાઉ લેવામાં આવ્યો હતો, જે સબસ્ટાન્ડર્ડ જાહેર થતા તેઓની સામે કેસ દાખલ કરવામા આવતા કોર્ટ દ્વારા તેઓને રૂ.૨૫૦૦૦નો દંડ ફટકારવામાં આવ્યો છે, જયારે કૈલાસ બેકરીનો પનીર લો ફેટનો અગાઉ લેવામાં આવેલ નમુનો સબ સ્ટાન્ડર્ડ જાહેર થતા કોર્ટ દવારા તેઓને રૂ.૨૦,૦૦૦નો દંડ ફટકારવામાં આવ્યો છે, ભાવનગર મહાનગરપાલિકા દ્વારા રજાના દિવસોમાં પણ ફુડ સેફ્ટી અંગેની ઝુંબેશ શરૂ રાખવામાં આવી હતી, સરકાર દ્વારા ફાળવવામાં આવેલ ફુડ સેફ્ટી વાન દ્વારાઅવેરનેસ ના -૮, સ્કુલ અવેરનેસના -૩ કાર્યક્રમ યોજવામાં આવ્યા હતા તથા ૧૧૫ નમુનાઓ લેવામાં આવેલ હતા.