T20 વર્લ્ડ કપ 2024નું કાઉન્ટડાઉન શરૂ થઈ ગયું છે. 2 જૂનથી શરૂ થનારી આ ICC ઈવેન્ટ માટે ટીમ ઈન્ડિયાના ખેલાડીઓ બે ગ્રુપમાં અમેરિકા જવા રવાના થઈ રહ્યા છે. આ દરમિયાન મોટા સમાચાર એ છે કે હાર્દિક પંડ્યા ટીમ ઈન્ડિયા સાથે અમેરિકા નહીં જાય. હાર્દિક આ સમયે ભારતમાં નથી, તે લંડનમાં રજાઓ માણી રહ્યો છે.

ટી-20 વર્લ્ડ કપ 2024માં ભારતીય ટીમે તેની શરૂઆતની મેચો માત્ર અમેરિકાની ધરતી પર જ રમવાની છે. અહેવાલ અનુસાર ટીમ ઈન્ડિયાનું પહેલું ગ્રુપ 25 મેના રોજ રાત્રે 10 વાગ્યે અમેરિકા જશે. રોહિત શર્મા, વિરાટ કોહલી, જસપ્રીત બુમરાહ, ઋષભ પંત જેવા મોટા ખેલાડીઓ આ ગ્રુપમાં સામેલ થશે. સંજુ સેમસન, યશસ્વી જયસ્વાલ, યુઝવેન્દ્ર ચહલ જેવા ખેલાડીઓનું બીજું જૂથ પાછળથી જશે.

હવે સવાલ એ છે કે હાર્દિક પંડ્યાનું શું? શું તે અમેરિકા જશે? તો કેવી રીતે? તો અહેવાલ મુજબ હાર્દિક હાલ લંડનમાં છે. તે ત્યાં રજાઓ ગાળી રહ્યો છે. હાલમાં જ તેણે સોશિયલ મીડિયા પર તેની કેટલીક તસવીરો પણ પોસ્ટ કરી છે, જેમાં તે સ્વિમિંગ પૂલમાં સ્વિમિંગ કરતો જોવા મળી રહ્યો હતો.

હાર્દિક પંડ્યા વિશે એવા અહેવાલ છે કે તે લંડનથી જ અમેરિકાની ફ્લાઈટ પકડશે અને અમેરિકામાં જ ટીમ ઈન્ડિયા સાથે જોડાશે.

ટી-20 વર્લ્ડ કપ 2024 માટે ટીમ ઈન્ડિયાને બે ભાગમાં વહેંચવાનું કારણ આઈપીએલ 2024ના પ્લેઓફ છે. IPL 2024 ની ફાઈનલ પહેલા પ્રથમ ગ્રૂપમાં અને ફાઈનલ પછી બીજા ગ્રૂપમાં જવાની યોજના બનાવવામાં આવી હતી. જો કે ટી-20 વર્લ્ડ કપ 2024 માટે પસંદ કરાયેલી ટીમ ઈન્ડિયાનો એક પણ ખેલાડી હવે આઈપીએલ 2024ની ફાઈનલમાં રમતા જોવા મળશે નહીં.