ઈરાનના રાષ્ટ્રપતિ ઈબ્રાહિમ રઈસીને લઈ જઈ રહેલા હેલિકોપ્ટરનું રવિવારે પૂર્વ અઝરબૈજાન પ્રાંતમાં ખરાબ હવામાનને કારણે હાર્ડ લેન્ડિંગ થયું હતું. રાષ્ટ્રપતિની હાલત વિશે કોઈ સત્તાવાર માહિતી પ્રાપ્ત થઈ નથી, પરંતુ એક મીડિયા રિપોર્ટમાં કહેવામાં આવ્યું છે કે તેઓ સુરક્ષિત છે અને જમીન માર્ગે તબરીઝ જઈ રહ્યા છે.

આ દરમિયાન બચાવ ટુકડીઓ ઉતરાણ સ્થળ પર પહોંચવાનો પ્રયાસ કરી રહી છે, પરંતુ ખરાબ હવામાનને કારણે તેમાં અવરોધ આવી રહ્યો છે. ઉતરાણ સ્થળ જંગલ વિસ્તાર છે અને ત્યાં પવન સાથે ભારે વરસાદ અને ધુમ્મસની જાણ કરવામાં આવી છે. દેશભરમાં તેમના સ્વાસ્થ્ય માટે પ્રાર્થના કરવામાં આવી રહી છે. ઈરાનના સરકારી ટીવી અનુસાર, રઈસી પડોશી દેશ અઝરબૈજાનની એક દિવસની મુલાકાતે હતા, જ્યાં તેમણે તેમના સમકક્ષ ઈલ્હામ અલીયેવ સાથે સંયુક્ત રીતે બાંધેલા ડેમનું ઉદ્ઘાટન કર્યું હતું.

પરત ફરતા સમયે તેમના હેલિકોપ્ટરને અઝરબૈજાનની સરહદ પર ઈરાનના પૂર્વ અઝરબૈજાન પ્રાંતમાં સ્થિત શહેર જોલ્ફા પાસે 'હાર્ડ લેન્ડિંગ' કરવું પડ્યું હતું. આ શહેર રાજધાની તેહરાનથી લગભગ 600 કિલોમીટર ઉત્તર-પશ્ચિમમાં આવેલું છે. રાષ્ટ્રપતિના હવાઈ કાફલામાં ત્રણ હેલિકોપ્ટર હતા, જેમાંથી બે સુરક્ષિત રીતે તેમના ગંતવ્ય સ્થાને પહોંચ્યા હતા.

રાષ્ટ્રપતિના હેલિકોપ્ટરમાં દેશના વિદેશ મંત્રી હુસૈન અમીર અબ્દુલ્લાહિયન, પૂર્વ અઝરબૈજાન પ્રાંતના ગવર્નર અને અન્ય અધિકારીઓ પણ હાજર હતા. સ્થાનિક સરકારી અધિકારીએ આ ઘટના માટે 'ક્રેશ' શબ્દનો ઉપયોગ કર્યો હતો, પરંતુ તેણે સ્વીકાર્યું હતું કે તે હજુ સુધી લેન્ડિંગ સાઇટ પર પહોંચ્યા નથી. ગૃહ પ્રધાન અહેમદ વાહિદીએ રાજ્ય ટીવી પર જણાવ્યું હતું કે બચાવ ટીમો આ વિસ્તારમાં જઈ રહી છે, પરંતુ ખરાબ હવામાન અને ધુમ્મસને કારણે હેલિકોપ્ટર સુધી પહોંચવામાં સમય લાગી શકે છે. વિસ્તાર થોડો ઉબડ ખાબડ અને સંપર્ક કરવો મુશ્કેલ છે.