મહાકુંભ મેળામાં જતા યાત્રિકોની સુવિધાને ધ્યાનમાં રાખીને પશ્ચિમ રેલવેએ એક મહત્વપૂર્ણ નિર્ણય લીધો છે. અમદાવાદ મંડળથી ચાલતી ત્રણ જોડી મહાકુંભ મેળા સ્પેશિયલ ટ્રેનોમાં વધારાની ભીડને પહોંચી વળવા માટે ચાર-ચાર કોચ ઉમેરવામાં આવ્યા છે. આ નિર્ણયથી યાત્રિકોને મુસાફરીમાં વધુ સુગમતા રહેશે.

કઈ ટ્રેનોમાં ઉમેરાયા કોચ?

પશ્ચિમ રેલવે દ્વારા નીચે દર્શાવેલી ત્રણ જોડી સ્પેશિયલ ટ્રેનોમાં વધારાના કોચ જોડવામાં આવ્યા છે:

ટ્રેન નં. 09413/09414 સાબરમતી-બનારસ-સાબરમતી મહાકુંભ મેળા સ્પેશિયલ: આ ટ્રેનમાં સાબરમતીથી 5, 9, 14 અને 18 ફેબ્રુઆરી 2025ના રોજ તથા બનારસથી 6, 10, 15 અને 19 ફેબ્રુઆરી 2025ના રોજ બે એસી 3-ટાયર અને બે સ્લીપર ક્લાસના વધારાના કોચ ઉમેરવામાં આવશે.

ટ્રેન નં. 09421/09422 સાબરમતી-બનારસ-સાબરમતી મહાકુંભ મેળા સ્પેશિયલ: આ ટ્રેનમાં સાબરમતીથી 23 અને 26 જાન્યુઆરી 2025ના રોજ તથા બનારસથી 24 અને 27 જાન્યુઆરી 2025ના રોજ બે એસી 3-ટાયર અને બે સ્લીપર ક્લાસના વધારાના કોચ ઉમેરવામાં આવી રહ્યા છે.

ટ્રેન નં. 09403/09404 અમદાવાદ-જંઘઈ-અમદાવાદ મહાકુંભ મેળા સ્પેશિયલ: આ ટ્રેનમાં અમદાવાદથી 5, 14, 15, 18, 19 અને 26 ફેબ્રુઆરી 2025ના રોજ તથા જંઘઈથી 7, 16, 17, 20, 21 અને 28 ફેબ્રુઆરી 2025ના રોજ બે એસી 3-ટાયર અને બે સ્લીપર ક્લાસના વધારાના કોચ ઉમેરવામાં આવશે.

વધુ માહિતી માટે:

ટ્રેનોના સ્ટોપેજ સમય અને સંરચના વિશે વધુ માહિતી મેળવવા માટે, મુસાફરો www.enquiry.indianrail.gov.in વેબસાઈટની મુલાકાત લઈ શકે છે.