ચેમ્પિયન્સ ટ્રોફી 2025ના ગ્રુપ સ્ટેજમાં ભારત અને ન્યૂઝીલેન્ડ વચ્ચે રમાયેલી મેચમાં ગ્લેન ફિલિપ્સે વિરાટ કોહલીનો એક અદ્ભુત કેચ પકડીને સૌને ચોંકાવી દીધા હતા. વિરાટ કોહલીની 300મી વનડે મેચમાં ગ્લેન ફિલિપ્સે હવામાં ઉડીને કેચ પકડ્યો હતો.

આ મેચ વિરાટ કોહલી માટે ખૂબ જ ખાસ હતી, પરંતુ તે માત્ર 14 બોલમાં 11 રન બનાવી શક્યો હતો. મેટ હેનરીએ વિરાટ કોહલીની વિકેટ લીધી હતી, પરંતુ આ વિકેટમાં ગ્લેન ફિલિપ્સનું મોટું યોગદાન હતું. મેટ હેનરીની ઓવરમાં વિરાટ કોહલીએ બેકવર્ડ પોઈન્ટ તરફ હવામાં શોટ રમ્યો હતો. ત્યાં ફિલ્ડિંગ કરી રહેલા ગ્લેન ફિલિપ્સે હવામાં ડાઈવ લગાવીને બોલને પકડી લીધો હતો.

ગ્લેન ફિલિપ્સ તેની શાનદાર ફિલ્ડિંગ માટે જાણીતો છે. આ મેચમાં પણ તેણે પોતાના અદ્ભુત કેચથી દર્શકોને મંત્રમુગ્ધ કરી દીધા હતા. વિરાટ કોહલીનો આ કેચ જોઈને સ્ટેડિયમમાં હાજર અનુષ્કા શર્મા પણ ચોંકી ગઈ હતી.