રાજ્યમાં GST વિભાગે ફરી એકવાર કાર્યવાહીનો ધમધમાટ શરૂ કર્યો છે. આ વખતે નિશાન બન્યા છે ટ્યુશન ક્લાસીસ સંચાલકો. અમદાવાદ, ગાંધીનગર, સુરત સહિતના શહેરોમાં 37 સ્થળોએ GST વિભાગની ટીમો દ્વારા દરોડા પાડવામાં આવી રહ્યા છે. ટ્યુશન ક્લાસીસ સંચાલકો દ્વારા કરચોરી કરવામાં આવી હોવાની શંકા પર આ કાર્યવાહી હાથ ધરવામાં આવી છે.

જાણવા મળતી માહિતી મુજબ GST વિભાગને મળેલી બાતમીના આધારે આ કાર્યવાહી હાથ ધરવામાં આવી છે. ટ્યુશન ક્લાસીસ સંચાલકો દ્વારા કરચોરી કરવામાં આવી હોવાની શંકા છે. જેમાં કરોડો રૂપિયાની કરચોરી થઈ હોવાની શક્યતા છે.

ઉલ્લેખનીય છે કે, અગાઉ સ્ટેટ GST વિભાગે બે સ્ક્રેપ વેપારીઓ સામે કાર્યવાહી કરી હતી. અમદાવાદમાં 2 સ્ક્રેપ વેપારીઓની રૂપિયા 1.86 કરોડની કરચોરી ઝડપાઇ હતી. જેમાં 300 ટનથી વધુ બિનહિસાબી સ્ટોક તથા વેચાણ સામે આવ્યા હતા. ગત 24 ડિસેમ્બરે સર્ચ ઓપરેશન કરવામાં આવ્યું હતું.

કરચોરી રોકવા માટે GST વિભાગની કડક કાર્યવાહી
GST વિભાગ દ્વારા કરચોરી રોકવા માટે સમગ્ર રાજ્યમાં આ પ્રકારની કાર્યવાહી હાથ ધરવામાં આવી રહી છે. આ કાર્યવાહીથી ટ્યુશન ક્લાસીસ સંચાલકોમાં ફફડાટ ફેલાયો છે.