નવેમ્બર 2024માં ગુડ્સ એન્ડ સર્વિસ ટેક્સ (GST) કલેક્શનમાં નોંધપાત્ર વધારો થયો છે. સરકાર દ્વારા જાહેર કરાયેલા આંકડા મુજબ નવેમ્બરમાં GST કલેક્શન 8.5% વધીને રૂ. 1.82 લાખ કરોડને પાર પહોંચ્યું છે. આ વધારો તહેવારોની સિઝનમાં વધેલી ખરીદી અને અર્થતંત્રમાં સુધારાના સંકેત તરીકે જોવામાં આવી રહ્યો છે.

નવેમ્બરમાં કુલ GST આવક 8.5 ટકા વધીને રૂ. 1.82 લાખ કરોડથી વધુ થઈ છે, જે એક વર્ષ અગાઉના સમાન મહિનામાં રૂ. 1.68 લાખ કરોડ હતી.

ઓક્ટોબરમાં રૂ. 1.87 લાખ કરોડનું GST કલેક્શન નવ ટકા વાર્ષિક વૃદ્ધિ સાથે બીજા નંબરનું શ્રેષ્ઠ GST કલેક્શન હતું. અત્યાર સુધીનું સૌથી વધુ કલેક્શન એપ્રિલ, 2024માં રૂ. 2.10 લાખ કરોડથી વધુ હતું.

સમીક્ષા હેઠળના મહિનામાં સ્થાનિક વ્યવહારોમાંથી GSTની આવક 9.4 ટકા વધીને રૂ. 1.40 લાખ કરોડ થઈ છે, જ્યારે આયાત પરના કરમાંથી આવક લગભગ છ ટકા વધીને રૂ. 42,591 કરોડ થઈ છે.