દિલ્હીના નવા મુખ્યમંત્રીના નામની જાહેરાત કરવામાં આવી છે. આમ આદમી પાર્ટીના નેતા અને દિલ્હી સરકારના મંત્રી આતિશીને પાર્ટી દ્વારા વિધાયક દળના નેતા તરીકે પસંદ કરવામાં આવ્યા છે. સીએમ અરવિંદ કેજરીવાલ લાંબા સમય બાદ તિહાર જેલમાંથી જામીન પર બહાર આવ્યા છે. આ પછી કેજરીવાલે રાજીનામું આપવાની જાહેરાત કરી હતી. આજે મળેલી ધારાસભ્ય દળની બેઠકમાં આતિશીને નવા સીએમ તરીકે પસંદ કરવામાં આવ્યા છે.

ઓક્સફર્ડમાંથી મેળવી ડિગ્રી

આતિશીનો જન્મ 8 જૂન 1981ના રોજ વિજય સિંહ, દિલ્હી યુનિવર્સિટીના પ્રોફેસર અને ત્રિપતા વહીને ત્યાં થયો હતો. આતિશીએ તેનું સ્કૂલિંગ સ્પ્રિંગડેલ સ્કૂલ, પુસા રોડ, દિલ્હીથી કર્યું છે. આ પછી તેણે દિલ્હીની સેન્ટ સ્ટીફન્સ કોલેજમાંથી ઈતિહાસમાં બીએ કર્યું. આતિશીએ ચેવેનિંગ સ્કોલરશિપ પર પ્રખ્યાત ઓક્સફોર્ડ યુનિવર્સિટીમાંથી માસ્ટર ડિગ્રી પૂર્ણ કરી. આ પછી તેણે ફરીથી ઓક્સફોર્ડમાંથી રોડ્સ સ્કોલર તરીકે ડિગ્રી મેળવી.

આતિશી એક શિક્ષક હતાં

આમ આદમી પાર્ટીમાં જોડાતા પહેલા આતિશીએ મધ્યપ્રદેશના એક નાના ગામમાં 7 વર્ષ કામ કર્યું હતું. રાજનીતિમાં આવતા પહેલા આતિશીએ આંધ્રપ્રદેશની ઋષિ વેલી સ્કૂલમાં થોડો સમય ઈતિહાસ અને અંગ્રેજી પણ ભણાવ્યું હતું. દિલ્હીની શૈક્ષણિક સંસ્થાઓના કાયાકલ્પમાં મહત્વની ભૂમિકા ભજવવાનો શ્રેય ઘણીવાર આતિશીને આપવામાં આવે છે.

આતિશી 2020માં બન્યા હતા ધારાસભ્ય

આતિશીએ 2013માં આમ આદમી પાર્ટી સાથે રાજકીય સફર શરૂ કરી હતી. જુલાઈ 2015 થી એપ્રિલ 2018 સુધી તે મનીષ સિસોદિયાનાં સલાહકાર હતાં. આ પછી વર્ષ 2019 માં આતિશીએ પૂર્વ દિલ્હી બેઠક પરથી લોકસભાની ચૂંટણી લડી હતી પરંતુ તે ગૌતમ ગંભીર સામે હારી ગયા હતા. જો કે 2020ની વિધાનસભાની ચૂંટણીમાં આતિશી પ્રથમ વખત કાલકાજી બેઠક પરથી ચૂંટણી જીતી અને ધારાસભ્ય બન્યા.