આંધ્રપ્રદેશના પૂર્વ ગોદાવરી જિલ્લાના દ્વારપુરી ગામમાં એક હૃદયદ્રાવક ઘટના પ્રકાશમાં આવી છે, જ્યાં ચાર માસૂમ બાળકો રમતી વખતે કારનો દરવાજો બંધ થઈ જતાં ગૂંગળામણથી મૃત્યુ પામ્યા હતા. આ ઘટના ગામના મહિલા મંડળ કાર્યાલય પાસે બની હતી જ્યારે બાળકો ત્યાં પાર્ક કરેલી એક કારમાં રમી રહ્યા હતા.

મૃતક બાળકોની ઉંમર 6 થી 8 વર્ષની વચ્ચે હતી

પ્રાપ્ત માહિતી મુજબ, મૃતક બાળકોની ઉંમર 6 થી 8 વર્ષની વચ્ચે હતી. એક પારિવારિક લગ્ન સમારોહમાં હાજરી આપવા ગયા હતા. આ દરમિયાન બાળકો રમી રહ્યા હતા અને રમતા રમતા બાળકો કારમાં બેસી ગયા. ભૂલથી દરવાજો અંદરથી બંધ થઈ ગયો. બહારના કોઈને આ વાતનો ખ્યાલ ન આવ્યો અને ખ્યાલ આવ્યો ત્યારે ખૂબ મોડું થઈ ગયું હતું.

મંત્રી કોંડાપલ્લી શ્રીનિવાસે આ ઘટના પર દુઃખ વ્યક્ત કર્યું

એમએસએમઈ મંત્રી કોંડાપલ્લી શ્રીનિવાસે આ ઘટના પર દુઃખ વ્યક્ત કર્યું અને કહ્યું કે લગ્ન સમારોહમાં હાજરી આપવા આવેલા પરિવારના આ બાળકો નજીકમાં રમી રહ્યા હતા. પછી તેઓ એક ત્યજી દેવાયેલી કારમાં ઘૂસી ગયા અને અંદરથી લોક થઈ ગયા. પરિવારને ઘણા સમય પછી આ વાતની ખબર પડી પરંતુ ત્યાં સુધીમાં ચારેય બાળકો - એક છોકરો અને ત્રણ છોકરીઓ મૃત્યુ પામ્યા હતા.

આ અકસ્માતથી આખા ગામને આઘાત લાગ્યો

આ કેસની માહિતી મળતા જ સ્થાનિક વહીવટીતંત્ર અને પોલીસ ઘટનાસ્થળે પહોંચી ગઈ હતી અને તપાસ શરૂ કરી હતી. આ અકસ્માતથી આખા ગામને આઘાત લાગ્યો છે અને લગ્નની ઉજવણી શોકમાં ફેરવાઈ ગઈ છે.