આજે સતત બીજા દિવસે રાજ્યના અનેક વિસ્તારોમાં સવારથી ધુમ્મસ જોવા મળી હતી. રાજકોટમાં વાતાવરણમાં ભેજનું પ્રમાણ સવારે ૯૬% હતું અને ભુજમાં ૯૧ ટકા સુરતમાં ૯૦ ટકા ભેજ નોંધાયો છે. સમગ્ર રાજ્યમાં સૌથી વધુ ભેજનું પ્રમાણ રાજકોટમાં રહ્યું હતું અને તેના કારણે ધુમ્મસની તીવ્રતા પણ રાજ્યના અન્ય શહેરોની સરખામણીએ રાજકોટમાં વધુ રહી હતી રસ્તાઓ અને વાહનો ભીના થઈ ગયા હતા. જૂનાગઢમાં આજે સવારે ૮૬% ભેજ નોંધાયો છે ગિરનાર પર્વત ધુમ્મસમાં ઢંકાઈ ગયો હતો અને ૬.૮ ડિગ્રી ઠંડી રહેવા પામી હતી. જૂનાગઢમાં લઘુતમ તાપમાન ૧૧.૮ અને ભવનાથ તળેટીમાં ૯.૮ ડિગ્રી નોંધાયું છે. ગઈકાલની સરખામણીએ આજે લઘુતમ તાપમાન નો પારો એકાદ ડિગ્રી જેટલો ઐંચકાયો છે પરંતુ આમ છતાં ઠંડીની તીવ્રતા ભેજવાળા વાતાવરણને કારણે જળવાઈ રહી છે. આજે નલિયામાં ૧૦.૮ રાજકોટમાં ૧૩ ભુજમાં ૧૫ કંડલામાં ૧૫.૯ ભાવનગરમાં ૧૪.૫ દ્રારકામાં ૧૭.૪ ઓખામાં ૧૯.૫ પોરબંદરમાં ૧૬ વેરાવળમાં ૧૭.૨ અને અમરેલીમાં ૧૧.૬ ડિગ્રી આજનું લઘુતમ તાપમાન નોંધાયું છે રાજ્યના અન્ય શહેરોની વાત કરીએ તો અમદાવાદમાં ૧૧.૮ ડીસામાં ૧૧.૨ અને સુરતમાં ૧૪ ડિગ્રી લઘુતમ તાપમાન આજે રહ્યું છે.