નાણા મંત્રી કનુ દેસાઇએ આજે વિધાનસભામાં બજેટ રજુ કર્યું છે. જેમાં નાણા મંત્રી કનુ દેસાઇએ ગરીબ અને વંચિતોના વિકાસ માટે સરકાર આવાસ, અન્નસુરક્ષા, પોષણ વગેરેને અગ્રિમતા આપે છે. આ બજેટમાં ‘ઘરનું ઘર’ સ્વપ્નને પરિપૂર્ણ કરવા ગરીબો માટે ૩ લાખથી વધુ આવાસો પૂરા પાડવાનું આયોજન છે. તેમણે કહ્યું કે પ્રધાનમંત્રી આવાસ યોજના(ગ્રામીણ), ડૉ. આંબેડકર આવાસ યોજના, પંડિત દિનદયાળ આવાસ યોજના તેમજ હળપતિ આવાસ જેવી યોજનાઓમાં હાલની રૂ. ૧ લાખ ૨૦ હજાર ની સહાયમાં મકાનદીઠ રૂ. ૫૦ હજારના માતબર વધારા સાથે રૂ. ૧ લાખ ૭૦ હજાર કરવાની જાહેરાત કરું છું.

નાણામંત્રીએ કહ્યું કે પોષણલક્ષી યોજનાઓના અસરકારક આયોજન અને અમલીકરણ એ અમારી સરકારનો મુખ્ય ઉદ્દેશ રહેશે. તેઓએ કહ્યું કે પોષણ અને તંદુરસ્તી માટે અલગ અલગ વિભાગો દ્વારા વિવિધ યોજનાઓ અમલમાં છે. પોષણને અગ્રિમતા આપતાં આ યોજનાઓ માટે ગત વર્ષ કરતાં આશરે ૨૧% ના વધારા સાથેની અંદાજીત ₹૮૨૦૦ કરોડની જોગવાઇ સૂચવું છું.