દેવભૂમિ દ્વારકા જિલ્લામાં મતદારયાદી ખાસ સંક્ષિપ્ત સુધારણા કાર્યક્રમ અંતર્ગત શુક્રવાર તારીખ ૫ ના રોજ મતદારયાદીની આખરી પ્રસિદ્ધિ કરવામાં આવશે. જિલ્લાના ૬૩૪ મતદાન મથકો પર બીએલઓ પાસે જઈ લોકોએ મતદારયાદીમાં પોતાના નામ, સરનામામાં ફેરફાર તેમજ નવયુવાન મતદારો પોતાના નામ ઉમેરવા કાર્યવાહી કરી હતી.
મતદારયાદી ખાસ સંક્ષિપ્ત સુધારણા કાર્યક્રમ દરમિયાન થયેલી તમામ ફેરફારો બાદ દેવભૂમિ દ્વારકા જિલ્લામાં તમામ વિધાનસભા મતદાર વિભાગમાં મતદારોની વિગતો જાહેર કરવામાં આવી છે.
જેમાં ખંભાળિયા વિધાનસભા મતવિસ્તારમાં ૧૫૫,૦૨૭ પુરુષ, ૧૪૮,૪૨૨ સ્ત્રી અને અન્ય ૧૧ મળી કુલ ૩૦૩,૪૬૦ જ્યારે દ્વારકા વિસ્તારમાં ૧૫૧,૩૩૧ પુરુષ, ૧૪૨,૪૪૭ સ્ત્રી અને ૮ અન્ય મળીને કુલ ૨૯૩,૭૮૬ સાથે સમગ્ર જિલ્લામાં કુલ ૫૯૭,૨૪૬ મતદારો નોંધાયા છે.
જિલ્લા ચૂંટણી અધિકારી અને કલેક્ટરના માર્ગદર્શન હેઠળ દેવભૂમિ દ્વારકાની ટીમ દ્વારા કુલ ૧૭,૩૦૦ ફોર્મ મેળવવામાં આવ્યા હતા. જેમાં ખંભાળિયા વિધાનસભા મતવિસ્તારમાં ૫૨૭૫ મતદારો તથા દ્વારકામાં ૪૩૫૩ મતદારોના નામ ઉમેરવા માટે કુલ ફોર્મ ૯૬૨૮ મંજુર કરવામાં આવ્યા છે.  જ્યારે ખંભાળિયામાં ૧૬૭૫ અને દ્વારકામાં ૧૪૬૪ એમ કુલ ૩૧૩૯ ફોર્મ નામ કમી કરવામાં આવ્યા છે. આ કાર્યક્રમ દરમિયાન નવા નોંધાયેલા મતદારોને ભારતના ચુંટણી પંચ દ્વારા ચુંટણી ઓળખકાર્ડ આપવામાં આવશે. જે આગામી લોકસભા સામાન્ય ચુંટણી- ૨૦૨૪માં તેમના મતાધિકારનો ઉપયોગ કરી શકશે.
મતદારયાદી સુધારણા ઝુંબેશ અન્વયે મળેલ તમામ ફોર્મસના હક્ક-દાવા અને વાંધા અરજીઓનો નિકાલ કરવામાં આવેલ અને ચૂંટણી પંચ દ્વારા તા. ૫ જાન્યુઆરી- ૨૦૨૪ રોજ આખરી મતદારયાદીની પ્રસિધ્ધિ કરવામાં આવશે. જેમાં કુલ ૯૬૨૮ મતદારોનો ઉમેરો થયેલ અને ૩૧૩૯ મતદારો કમી થયેલ આમ, જિલ્લામાં કુલ ૬૪૮૯ મતદારોનો વધારો થયેલ છે. જેમાં ખંભાળિયા વિધાનસભા મતવિસ્તારમાં ૩૬૦૦ અને દ્વારકામાં ૨૮૮૯ મતદારોનો ઉમેરો થયો છે.
જિલ્લામાં કુલ ૧૮૨ ઈએલસી કલબ, ૪૦૭ ચુનાવ પાઠશાળા, ૯૩ વોટર અવેરનેશ ફોરમ, ૧૨ કોલેજના ૧૭ કેમ્પસ એમ્બેસેડર મારફત સ્વીપ એક્ટિવિટી અંતર્ગત જિલ્લાની તમામ કોલેજમાં ૧૮-૧૯ વયજૂથના યુવા વિધાર્થીઓ માટે મતદાર નોંધણીના ખાસ કેમ્પનું આયોજન કરવામાં આવેલ હતું, જિલ્લાના તમામ બીએલઓ, સુપરવાઈઝર, નાયબ મામલતદાર અને ચાર તાલુકા મામલતદાર, ચાર તાલુકા વિકાસ અધિકારી, બે પ્રાંત અધિકારી, નાયબ જિલ્લા ચૂંટણી અધિકારી અને જિલ્લાની મતદારયાદી શાખાની ટીમ દ્વારા જિલ્લા ચુંટણી અધિકારી અને કલેકટરના માર્ગદર્શન હેઠળ ખાસ ઝુંબેશ ચલાવવામાં આવી હતી.