જસદણના જુના માર્કેટિંગ યાર્ડમાં ટેકાના ભાવે ખેડૂતોની મગફળીની થતી ખરીદીમાં એજન્સીના અધિકારીઓ ખેડૂતોની કનડગત કરી રહ્યા હોવાનું અને ખેડૂતો સાથે જબરદસ્તી કરતા હોવાના વિડિયો વાયરલ થયા છે.

જેમાં જણાવ્યા મુજબ જસદણ જુના માર્કેટિંગ યાર્ડ ખાતે મગફળી લઈને આવેલા ખેડૂતો પાસેથી ગુજકોમાસોલના અધિકારી દ્વારા મગફળીનું સેમ્પલ લેવામાં આવે છે, તેમાં 130થી 140નો ઉતારો આવે છે તે મગફળીને પાસ કરવામાં આવે છે અને પછી ખરીદી કરવામાં આવે એવો નિયમ છે, પરંતુ જસદણમાં અનેક ખેડૂતભાઈઓની મગફળી ખરીદી કરી લીધી ત્યારબાદ બિલ આપી દીધું અને પાઽચ દિવસ પછી એજન્સીવાળા એમ કહે છે કે તમારી મગફળી રિજેક્ટ થઈ છે માટે માલ પાછો લઈ જાવ. જેથી જસદણ પંથકમાં અનેક ખેડૂતો એજન્સીની આવી કનડગતનો શિકાર બન્યા અંગે રજૂઆત કરવા જતા એજન્સીના અધિકારીઓ  રિજેક્શનનું કારણ આપતા નથી અને જબરદસ્તી કરતા હોવાની ખેડૂતોએ યાર્ડના અધિકારીઓને પણ રજૂઆત કરી હતી.

એજન્સીના અધિકારીઓને પૂછતા તેઓ ઉપર ગોડાઉનને રિજેક્ટ કર્યું હોય તેવું કહી રહ્યા છે, ખેડૂતો મગફળી કયા કારણે રિજેક્ટ થઈ તેની રજૂઆત કરતા એજન્સીના માણસો અને ખેડૂતો વચ્ચે બબાલ થઇ હતી, ખેડૂતોમાં રોષની લાગણી ફેલાઇ ગઇ હતી.