ભાવનગર મહાલિકા દ્વારા શહેરમાં દબાણો સામે હાથ ધરવામાં આવેલું અભિયાન મંદ પડતા જ દબાણકર્તાઓ ફરીથી અડચણ ઉભી કરવા લાગ્યા હોવાની છેલ્લા દિવસો દરમ્યાન એસ્ટેટ વિભાગમાં રજુઆતો આવતા એસ્ટેટ વિભાગ અને દબાણ હટાવ સેલની ટીમ મોડી રાતે શહેરના ઘોઘા સર્કલ અને તેની આજુબાજુના વિસ્તારમાં ત્રાટકી હતી. અને જાહેર રોડ તેમજ ફૂટપાથ સહિતમાં અડચણરૂપ દબાણો સામે કાર્યવાહી હાથ ધરતા દબાણકર્તાઓ અને ગરમીથી છુટકારો મેળવવા નીકળેલા લોકોમાં નાસભાગ થઈ હતી.
એસ્ટેટ વિભાગ દ્વારા અડચણરૂપ નાનામોટા અસ્થાઈ દબાણો હટાવી  લારી, ગલ્લા ઉપરાંત ખાણી-પીણી તેમજ બગી, બાળકો માટેની ટ્રેન સહિતનો માલસામાન જપ્ત કરવામાં આવતા દબાણકર્તાઓમાં ભાગદોડ થઈ પડી હતી. દબાણ હટાવ કાર્યવાહી દરમ્યાન એસ્ટેટ વિભાગ અને દબાણ હટાવ સેલની ટીમ દ્વારા નડતરરૂપ મુકવામાં આવેલ રીક્ષા સહિતના વાહનોને લોક ઠપકારી દંડ વસુલ કરવામાં આવ્યો હતો.